ئەمریکا نیگەرانی لەهەمبەر قەیرانی عێراق دەربڕی
دوای ئەوەی شاندی نێوان کوردستان و بەغدا بەهیچ ئەنجامێک نەگەیشتن بۆ چارەسەری کێشە و گوتەکانی مالکی لە کۆنگرەیەکی رۆژنامەوانی، بارودۆخەکەی پتر بەرەو ئاڵۆزی برد، ئەمەریکا نیگەرانی خۆی لەهەمبەر کێشەکان دەربڕی و باڵوێزی ئەمەریکا ستیڤن بیرکۆفت لە عێراق سەردانی سەرۆک کۆمار جەلال تاڵەبانی لە شاری سوڵێمانی کرد و هەمان رۆژیش سەردانی سەرۆک بارزانی سەرۆکی کوردستان و نێچیرڤان بارزانی سەرۆکی حکوومەتی کوردستانی کرد. سەرۆک بارزانی لە دیدارەکەدا رایگەیاند کە ئەوەی لەناوچە دابڕێنرداوەکان روودەدات نادەستوورییە و جێگەی قبولکردن نییە و هەروەها سەرۆکی حکوومەتیش رایگەیاند کە بەهیچ شێوەیەک قبول ناکەن کارەکان یەکلایەنانە لەو ناوچانە جێجەجێبکرێت و حکوومەتی کوردستان لەگەڵ چارەسەری کێشەکان لەرێگەی گفتوگۆو دانوستانە.
لەهەمان کاتدا سەرچاوەیەکیش لە یەکێتی نیشتیمانی کوردستان دوای دیداری نێوان سەرۆک تاڵەبانی و بیرکۆفت، رایگەیاند هەر گۆڕانکارییەک لە ناوچەکە دەبێت لەرێگەی هەماهەنگی لە نێوان حکوومەتی فیدارالی لەبەغدا و هەرێـمی کوردستان ئەنجام بدرێت نەک تەنیا لایەنێک بیکات.
لەهەمان کاتیشدا باڵوێزی ئەمەریکا سەرەڕای نیشاندانی نیگەرانی لەمەڕ کێشە و قەیرانەکان، رایگەیاند کە ناکرێت تاکلایەنانە چارەسەری ئەو کێشانە بکرێت و یاخود هەڵسوکەوت بکرێت.
لە چەند راۆژی رابردوودا لەئاکامی بەردەوامبوونی کێشەکان و بە ئەنجام نەگەیشتنی دانوستانەکانی شاندی سەربازی لەبەغدا و پێداگری نوری مالکی سەرۆک وەزیرانی عێراق لە سەر کێشەکان و تەنیا بانگەشەکردن بۆ بەکارهێنانی شێوازی تازە لە یەکلایکردنەوەی کێشەکان لەگەڵ لایەنە شیعییە رکابەرەکانی و هەڕەشەکرن لەکورد لە نابێت چەکیان هەبێت و شەڕی ئەمجارە دەبێتە شەڕی نێوان دوو نەتەوەی کورد و عەرەب، شەقامی عێراقی رووبەرووی نیگەرانی و شلەژان کردۆتەوە.
رەچاو دەکرێت لە ئەنجامی بەردەوامی سیاسەتی تاکڕەوانەی مالکی لە ئیدارەکردنی حکوومەت، لەم نزیکانە سەرۆکی عێراق جەلال تاڵەبانی بگەڕێتەوە بەغدا و دەست بە گفتوگۆ و چالاکی لەگەڵ لایەنە عێراقییەکان بکات، بۆ رێگرتن لە فرەبوونی کێشەکان و هەورەها رەوتی سەدریش جارێکی دیکە بەدوای کۆکردنەوەی دەنگ و لایەنەکانە بۆ وەرگرتنەوەی متمانە لە مالکی، سەرۆک وەزیرانی عێراق لە دیدارە رۆژنامەوانییەکەی رۆژی ١-١٢-٢٠١٢ لەبەغدا ناراستەوخۆ هێرشی کردە سەر رەوتی سەدر و هەروەها بەردەوامی هاوپەیمانی نێوان کورد وشیعەی بە دژایەتی سونە ناوبرد. سەرباری پێداگری لە سەر نەبوونی بەڵگە لەمەسەلەی تێوەگلانی نیزکەکانی خۆی لە گەندەلی و گرێبەستی چەککڕین لە روسیا و درێژەدان بە کڕێنی چەک لەم وڵاتە.
