سامان فەوزی: پرسی خاك گرنگترین داواكاری كورده دەبێت بەردەوام پێی لەسەردابگرێت
پەرلەمانتارێکی لیستی هاوپەیمانی کوردستانی ڕایدەگەیەنێت, مەسەلەی خاک لەهەموو داواکاریەکانی دیکە بۆ کورد گرنگترە، وتیشی، له عێراق دوو جۆر بیركردنه‌وه هه‌یه، یه‌كێكیان ده‌سه‌ڵات به‌ره‌و ناوه‌ند ده‌بات و ئه‌وه‌ی دیكه پێی وایه ده‌بێت هه‌رێم و پارێزگاكات به‌هێز بكرێن.
ئەندامی ئەنجومەنی نوێنەرانی عێراق لە لیستی هاوپەیمانی کوردستانی دکتۆر سامان فەوزی بە پەیامنێری ڕاگەیاندوه : گرنگترین داواكاری كورد، دەبێت بەردەوام پێی لەسەردابگرێت پرسی خاكە كه لە هەموو داواكاریەكانی دیكە گرنگترە، هه‌روه‌ك له نۆزدە خاڵیەكه‌ی كورد باس له جێبەجێكردنی مادەی سەد و چل كراوه بەڵام گومانی تێدا نییه مەسەلەكانی دیكەش هه‌ر لە ئەنجومەنی فیدراڵیەوە تا دەگاتە دەركردنی یاسای نەوت و غاز گرنگی خۆیان هەیە، دەركردنی یاسای نه‌وت و گاز دەبێت بەگوێرەی دەستوور بێت كە ئیدارەكردن و دانانی پلانی ستراتیژی بۆ بەڕێوەبردنی نەوت و گاز به‌ره‌زامه‌ندی هەردوو لابێت، چونكە ئابووری مەسەلەیەكە جیاناكرێتەوە لەسیاسەت، ئەگەر هەرێمێكی بەهێزت هەبێت دەبێت ئابووریەكی بەهێزیش هەبێت.
فەوزی گوتیشی:"دەبێت وابكەین یاساكە ڕەنگدانەوەی دەستوری عێراق بێت، نابێت لەیادمان بچێت ئێستا لەعێراق دوو جۆر بیركردنەوە هەیە دانەیەكیان هەوڵ دەدات عێراق بەرەو ناوه‌ند بەرێت و پێی وایە ئەو فیدراڵیەتەی لەدەستوردا دانراوە زیاد لەپێویستە و لەكاتێكدا بەردەوام باس لەوە دەكرێت دەسەڵات كەمبۆتەوە، بەپێچەوانەشەوە بیر كردنەوەیەكی دیكە هەیە پێی وایە بەردەوام دەبێت هەرێمە فیدراڵیەكان بەهێزتر بێت و ئەنجومەنی پارێزگاكان دەسەڵاتیان زیاتر بێت، دەبێت فیدراڵیەت دەسەڵات و پارە بێت ونابێت ئەو دووانە لەدەسەڵاتی ناوه‌ندا قۆرخ بكرێت، دەبێت شۆڕبكرێتەوە بۆ هەرێم و پارێزگاكان، ئەم دوو بیركردنەوەیەش ئێستا لەپێكداداندان كە ئێستاش لەسەر مەسەلەی نەوت و گاز دروست بووە بۆیە وادەردەكەوێت پێكدا دانێكی توندە، بۆیە بەڕای من هەردوو مەسەلەكە گرنگە بەڵام گرنگتر مەسەلەی خاك و ناوچە دابڕێنراوەكانە لەهەرێمی كوردستان كە دەستوری عێراق ناوی لێناوە جێناكۆك."
ئەندامەکەی ئەنجومەنی نوێنەرانی عێراق ئاماژەی بۆ ئەوەشکرد:" چەند ڕۆژێك بەر لەئێستا گوێمان لە بەرپرسانی عێراقی دەبێت دەڵێن دەستور ناوی ئه‌و ناوچانه‌ی ناوە جێناكۆك بەڵام ئێمە پێی دەڵێین ئەو ناوچانەی جێگەی گرنگی هەرێم و بەغدان بۆیە خەریكە ناوەكەی به‌مشێوه‌یه دەگۆڕن، بۆیە لەداهاتوودا هەرێمی كوردستان هەر خواستێكی دیكەی هەبێت مەسەلەی ئابووری لایەنێكی گرنگ دەبێت بۆ بەدیهێنانی ئەو خواستانە.
