ئەسەد كار بۆ هەڵگیرسانی شەڕی ناوخۆ لە لوبناندا دەكات
سەرۆكی سووریا بەشار ئەسەد داوا لە دەزگای هەواڵگریی وڵاتەكەی دەكات كار بۆ هەڵگیرسانی شەڕی ناوخۆ لە لوبناندا بكات.
كەناڵی "ئەلعەرەبییە" ژمارەیەك دۆكیومێنتی نهێنیی دەزگای هەواڵگریی سووریای بڵاو كردەوە و تیایاندا ئەوە دەردەكەوێت، كە بەرپرسانی سووریا جەخت لە سەر هەڵگیرسانی شەڕی ناوخۆ لە لوبناندا دەكەنەوە.
دۆكیومێنتە نهێنیەكان ئەوە دەردەخەن، كە بەرپرسانی باڵای سووریا داوایان لە دەزگای هەواڵگریی وڵاتەكەیان كردووە، دەست بە تیرۆركردنی كەسایەتییە ئاینییەكانی لوبنان بكات بۆ ئەوەی لەو ڕێگایەوە شەڕی ناوخۆ لەو وڵاتەدا هەڵگیرسێت.
هەر بە گوێرەی ئەم دۆكیومێنتانە بەشار ئەسەد پێی وایە هەڵگیرسانی شەڕی ناوخۆ لە لوبناندا دەبێتە هۆی دروستبوونی جیاوازی لە نێوان بەرپرسانی وڵاتانی ناوچەكە و ڕۆژئاوادا و بەو جۆرەش بارودۆخی سووریا لەبیر دەكرێت و ئەو كاتەیش سوپای سووریا دەتوانێت وڵات كۆنترۆڵ بكاتەوە.
