میری ده‌وڵه‌تی كوه‌یت و مه‌سرور بارزانی تاوتوێی په‌ره‌پێدانی په‌یوه‌ندییه‌كان كوردستان و كوه‌یت ده‌كه‌ن
شێخ صەباح ئەحمەد جابر ئەلصەباح میری دەولەتی كوه‌یت و مەسرور بارزانی راوێژکاری ئەنجوومەنی ئاسایشی هەرێمی کوردستان تاوتوێی بارودۆخی عێراق و ناوچه‌كه و په‌ره‌پێدانی په‌یوه‌ندییه‌كانی نێوانی هه‌ردوولا ده‌كه‌ن.
سه‌ر له به‌یانی ئه‌مڕۆ میری ده‌وڵه‌تی كوه‌یت پێشوازی له راوێژکاری ئەنجوومەنی ئاسایشی هەرێمی کوردستان و شاندی یاوەری کرد.
له سه‌ره‌تای دیداره‌كه‌دا مەسرور بارزانی وێرای گەیاندنی سڵاو و رێزی سەرۆکی هەرێم، پەیامی بەڕێزیانی ئاراستەی ئەمیری دەولەتی كوه‌یت کرد کە بریتی بوو لە دووپاتکردنەوەی ویستی فراوانکردنی زیاتری هاوکاری و هەماهەنگی لە گشت ئەو بوارانەی جێگەی بایەخی هەردوو لایە.
هەر لەم دانیشتنەدا وێڕای تاوتوێکردنی باری عێراق و ناوچەکە، جەخت لە سەر ئەوە کرایەوە کە گشت کێشە و گرفتەکانی ناوچەکە بە گرتنەبەری رێگە چارەی ئاشتیانەی و دیالۆگ و یەکتر قبولکردن چارەسەر بکرێن.
له‌گه‌ڵ ئه‌مه‌شدا هەردوو لا کۆک بوون لە سەر ئەوەی پێویسته رێز لە ویستی گەلانی ناوچەکە بگیرێت و کۆتایی بە بەکارهێنانی هێز دژ بە خواستی گەلان بهێنرێت.
لە بەشێکی دیکەی دیدارەکەدا چۆنیەتی پەرەپێدانی ئاستی پەیوەندییەکان و هاوکاریی هەرێمی کوردستان و دەولەتی كوه‌یت خرایە بەر باس و ئاماژە بە گرتنەبەری رێکاری کردەیی درا بۆ ئەوەی هەرچیی زووتر ئاستە جیاجیاکانی پەیوەندیی هەردوو لا گەشەسەندنی زیاتر بەخۆوە ببینێت.
هەر ئەمرۆ و لە دیدارێکی جیادا شێخ نەواف ئەحمەد جابر ئەلصەباح وه‌لی عەهدی دەولەتی كوه‌یت پیشوازیی لە مەسرور بارزانی و شاندی یاوەری کرد و لە دیدارێکدا زۆر بابەتی جێگەی بایەخی هاوبەشێ هەردوولا، لەوانەش دوا پێشهاتەکانی ناو عێڕاق و ناوچەکە خرانە بەر باس.
هەر لە میانەی ئەم دیدارەدا وەلی عەهدی كوه‌یت پشتگیریی خۆی بۆ داوا ڕەواکانی کورد لە ناوچەکە و عێراق دووبارە کردەوە و ئومێدی خواست کە گشت پێکهاتەکانی عێراق بتوانن بە ئاشتی ودوور لە دەستێوەردانی دەرەکی پێکەوە ئاشتیانە بژین.
هەر لەم دیدارەدا جەخت لە سەر پەرەسەندنی پەیوەندییە دووقۆلیەکان، لە ئاستە جیاجیاکاندا کرایەوە.
