25 ملیار دینار بۆ قه‌ره‌بووى ئاواره‌كانى كه‌ركووك ته‌رخان ده‌كرێت
لیژنه‌ى باڵاى مادده‌ى سه‌د‌و چل له به‌غدا له دوایین كۆبوونه‌وه‌یدا بڕیاریدا به ته‌رخاندنكردنى 25 ملیار دینار بۆ قه‌ربووكردنه‌وه‌ى ئاوه‌ره‌كان له شارى كه‌ركووك كه ده‌كاته 2500 چه‌كى قه‌ره‌بوو.
كاكه ره‌ش سدیق، ئه‌ندامى لیژنه‌ى باڵاى مادده‌ى 140و سه‌رۆكى ئۆفیسى كه‌ركووكى لیژنه‌كه رووداوى راگه‌یاندووه "له دواین كۆبوونه‌وه‌ماندا له شارى به‌غدا، هادى ئه‌لعامرى سه‌رۆكى لیژنه‌ى باڵاى مادده‌ى 140 بریاریدا به ته‌رخانكردنى 25 ملیار دینار بۆ قه‌ره‌بووكردنه‌وه‌ى عه‌ره‌بى هاورده‌و ئاواره‌كانى شارى كه‌ركووك".
كاكه ره‌ش گوتى "پاره‌كه له ناوه‌راستى مانگى 10 ده‌گاته شارى كه‌ركووك‌و چه‌كى قه‌ره‌بووش ئاواره‌كانى قۆناغى 29 ده‌گرێته‌وه، هه‌روه‌ها عه‌ره‌بى هاورده‌كانى قۆناغى 14ش ده‌گرێته‌وه، چونكه چه‌كى قه‌ره‌بووى ئاواره‌كان 10 ملیۆن دیناره‌‌و هى عه‌ره‌بى هاورده 20 ملیۆن دیناره".
