نێچیرڤان بارزانى: ئەمڕۆ شۆڕشی ئێمە، شۆڕشی ئاوەدانکردنەوەیە
سه‌رله‌به‌یانیى ئه‌مڕۆ دووشه‌مه 24ى ئه‌یلوولى 2012 نێچیرڤان بارزانى سه‌رۆك وه‌زیرانى هه‌رێمى كوردستان به ئاماده‌بوونى ژماره‌یه‌ك وه‌زیر و بریكارى وه‌زیر به‌ردى بناغه‌ى كۆمه‌ڵگه‌ى فامیلى مۆڵى بازرگانى له پارێزگاى دهۆك دانا و رایگه‌یاند "هیچ وڵاتێك به ته‌نیا به حكوومه‌ت ئاوه‌دان ناكرێته‌وه، پێویسته كه‌رتى تایبه‌ت به هه‌موو توانایه‌كه‌وه پشتیوان بێت".
نێچیرڤان بارزانى له وته‌یه‌كدا ئاماژه‌ى به گرنگیى ئه‌و پرۆژه‌یه كرد و گوتى: "گرنگییا ئه‌ڤی پڕۆژه‌ی ژ وێ چه‌ندێ دهێـت كو دێ خه‌لكه‌كێ زور كار تێدا كه‌ت، ڤه‌دیتنا ده‌لیڤه‌ێین كاری بۆ خه‌لكێ مه گرنگییه‌كا گه‌له‌ك پێدڤییه، دخوازم ئه‌ڤ پڕۆژه‌یێن وه‌ك فاملی مۆل و هه‌ر پڕۆژه‌یه‌كێ دی ل كوردستانێ وه‌ختێ دهێنه ئه‌نجامدان، پێدڤییه ئه‌وله‌ویه‌تا وێ بۆ وێ ئێكێ بیت كا دێ چه‌وا ده‌لیڤه‌یێن كاری بۆ خه‌لكێ خۆ دابین كه‌ن".
هه‌روه‌ها سه‌رۆكى حكوومه‌ت باسى له‌وه‌ش كرد كه له‌و پرۆژه‌یه‌دا 100 ملیۆن دۆلار خه‌رج ده‌كرێ و نزیكه‌ى 1000 كه‌سى ناوچه‌كه‌ش كارى تێدا ده‌كه‌ن. له به‌شێكى دیكه‌ى وته‌كه‌یدا سه‌رۆكى حكوومه‌ت ده‌ستخۆشى له سه‌رمایه‌دارانى هه‌رێمى كوردستان كرد و گوتى: پشكدارییا وان د شۆرشا ئاڤه‌دانكرنا كوردستانێدا كێمتر نینه ژ وێ خه‌باتا پێشمه‌رگێن قه‌هره‌مان د رۆژێن سه‌خت دا بۆ وه‌لاتی كری".
نێچیرڤان بارزانى داواى له كه‌رتى تایبه‌ت له هه‌رێمى كوردستان كرد، كه ڕۆڵى خۆیان له پرۆسه‌ى ئاوه‌دانكردنه‌وه‌ى وڵات ببینن، چونكه داینه‌مۆى هه‌ر حكوومه‌تێك كه‌رتى تایبه‌ته و گوتى: " تنێ ب حكوومه‌تێ چ وه‌لاته‌ك ل دونیایێ پێش ناكه‌ڤیت، پێدڤییه، كه‌رتێ تایبه‌ت ب هه‌موو هێزا خۆ ڤه پشته‌ڤان بیت بۆ پێشئێخستنا وه‌لاتێ مه".
جێى باسه ئه‌و پرۆژه‌یه ده‌كه‌وێته ڕۆژئاواى شارى دهۆك، كه له فامیلى مۆڵ و فامیلى فه‌ن پێك دێت به گوژمه‌ى 100 ملیۆن دۆڵار له سه‌ر ڕووبه‌رى 150 كیلۆمه‌تر چوارگۆشه و له ماوه‌ى 18 مانگدا له لایه‌ن كۆمپانیاى دارین گرووپه‌وه جێبه‌جێ ده‌كرێ.
ئه‌مه‌ش ده‌قى وته‌ى نێچیرڤان بارزانى سه‌رۆك وه‌زیرانى هه‌رێمى كوردستانه له ڕێوڕه‌سمى دانانى به‌ردى بناغه‌ى پڕۆژى فامیلى مۆڵ و فامیلى فه‌ن له دهۆك:
هه‌مى لایه‌ك بخێر بێن سه‌رچاڤان،
ئه‌ز گه‌له‌ك كه‌یف خۆشم كو جاره‌كا دى سه‌ره‌دانا پارێزگه‌ها دهۆكێ و باژێرێ دهۆكێ بكه‌م، ئه‌م ئه‌ڤرۆ ل ڤێره كۆمبووین بۆ دانانا به‌رێ بناغێ پڕۆژه‌یه‌كێ گرنگ كو خزمه‌تا خه‌لكێ ده‌ڤه‌را دهۆكێ ب گشتى دكه‌ت، ئه‌و ژى پڕۆژه‌یێ فامیلى مۆڵه ل دهۆكێ، كۆمپانییا دارین ئه‌ڤى كارى دكه‌ت و به‌رى نها ژى ڤێ كۆمپانیێ هه‌م ل هه‌ولێرێ و هه‌م ل سلێمانیێ ژى ده‌ستپێكریه و ڤى كارى ئه‌نجامدده‌ن، جهێ ده‌ستخۆشیێ یه كو ئه‌ڤرۆ ئه‌و قازانجا سه‌رمایه‌دارێن مه ل كوردستانێ دكه‌ن هه‌ر ل خه‌لكێ مه و ل وه‌لاتێ خۆ ڤێ قازانجێ خه‌رج دكه‌ن، ئه‌ڤه دیارده‌یه‌كا گه‌له‌ك باشه ئه‌ڤرۆ ئه‌م دبینین، و نیشانا خه‌مخۆرییا سه‌رمایه‌دارێن كوردستانێ یه بۆ ئاڤاكرنا ڤى وه‌لاتى، مه زۆر جاران به‌حسێ ڤێ چه‌ندێ كریه كو داینه‌مۆییا هه‌ر حوكمه‌ته‌كێ كه‌رتێ تایبه‌ته، ئه‌گه‌ر ته كه‌رته‌كێ تایبه‌تێ جددى د وه‌لاتێ خۆدا هه‌بیت، ئه‌گه‌ر ته سه‌رمایه‌دارێن باش و جددی هه‌بن بۆ كاری د وه‌لاتی دا وه‌لات دێ پێشكه‌ڤیت.
بتنێ ب حكومه‌تێ چ وه‌لاته‌ك ل دونیایێ پێش ناكه‌ڤیت، پێدڤییه كه‌رتێ تایبه‌ت ب هه‌موو هێزا خۆ ڤه پشته‌ڤان بیت بۆ پێشئێخستنا وه‌لاتێ مه.
گرنگییا ئه‌ڤی پڕۆژه‌ی زێده‌تر بۆ من د هندێ دایه، ئه‌ز باوه‌رم ل هه‌ولێرێ ژى ب هه‌مان شێوه‌یه، بۆیه ئه‌گه‌رێ هندێ كو خه‌لكه‌كێ زۆر كار تێدا بكه‌ت، ڤه‌دیتنا ده‌لیڤه‌یا كاری بۆ خه‌لكێ مه گرنگییه‌كا گه‌له‌ك پێدڤییه، فێركرنا خه‌لكێ مه بۆ هندێ زێده‌تر خۆ ماندی بكه‌ن و كاربكه‌ن و ئه‌ز دخوازم ئه‌ڤ پڕۆژه‌یێن وه‌ك فامیلى مۆڵ و هه‌ر پڕۆژه‌یه‌كێ دی ل كوردستانێ وه‌ختێ دهێنه ئه‌نجامدان، ته‌ئكید پێدڤییه ئه‌وله‌ویه‌تا وێ بۆ وێ ئێكێ بیت كا دێ چه‌وا ده‌لیڤه‌یێن كاری بۆ خه‌لكێ خۆ به‌رهه‌ڤ كه‌ین، ئه‌ڤه گرنگترین تشته بۆ ڤی پڕۆژه‌ی كو 100 ملیۆن دۆلار دێ تێدا هێنه خه‌رجكرن و دورێن 1000 كه‌سان یان كێمتر ژ خه‌لكێ مه خه‌لكێ ئه‌ڤێ ده‌ڤه‌رێ دێ ده‌لیڤه‌یێن كاری بۆ په‌یدا بكه‌ت.
ل بیرا منه چه‌ند سالان به‌ری نها ئێكه‌مین پڕۆژێ كه‌رتێ تایبه‌ت، ئه‌ز باوه‌ردكه‌م كو ب قه‌باره‌یه‌كێ مه‌زن، پڕۆژێ "مازی" بوو ل دهۆكێ هاتیه دانان، د رۆژا خۆ دا وه‌ختێ ئه‌و پڕۆژه هاتییه دانان، كه‌سێ باوه‌ر نه‌دكر كو دێ رۆژه‌كا وه‌كو ئه‌ڤرۆ ئه‌م ل كوردستانێ بینین، ئه‌و رۆژا كو حه‌جی مه‌شهود ده‌ست ب وی پڕۆژه‌ی كری بیرا من دهێت ئاخفتنا به‌ری هنگی من گۆتی، پێدڤییه ئه‌م رانه‌وه‌ستین، بێژین كا دێ چ چێ بیت ل وه‌لاتێ مه، یا ن دێ چه‌وا بیت وه‌لاتێ مه، پێدڤییه زۆر ب گه‌شبینی به‌رێ خۆ بده‌ینه پاشه‌رۆژێ، ئه‌م هه‌موو ڤێكرا هه‌ول بده‌ین هه‌ر ئێك ب شیانێن خۆ ئه‌ڤی وه‌لاتی ئاڤه‌دان بكه‌ت، ئه‌وێ رۆژێ كێم كه‌سان باوه‌ری هه‌بوو كو ئه‌و پڕۆژه دێ سه‌ركه‌ڤیت، هنده‌كان باوه‌ریا وان ئه‌و بۆ كو دێ ب شه‌ش هه‌یڤان دا شكه‌ستنێ ئینیت، له‌و پڕۆژه تا نها به‌رده‌وامه.
ئه‌ڤرۆ ژى ئه‌ز ب راستی پیرۆزباهیێ ل كۆمپانییا "دارین" دكه‌م بۆ هندێ ئه‌ڤ پڕۆژێ هۆ یێ گرنك ل ده‌ڤه‌را دهۆكێ ئه‌نجامدای، ده‌ستخۆشیێ ل وان دكه‌م، ئه‌ڤه كاره‌كێ گه‌له‌كێ درسته و گه‌له‌كێ پێدڤییه بۆ ده‌ڤه‌را دهۆكێ و وه‌كی من بۆ هنگو گۆتی ل هه‌مییان ژى گرنگتر ل ده‌ڤ من ئه‌ڤه‌یه كو سه‌رمایه‌دارێن مه ب پارێ خۆ هه‌ر قازانجه‌كا بكه‌ن د وه‌لاتێ خۆ دا خه‌رج بكه‌ن ڤه، وه‌ختێ مه ئه‌ڤه دیت ل سه‌رمایه‌دارێن خۆ، ئه‌ڤه نیشانا خه‌مخۆرییا وانه بۆ ئاڤه‌دانكرنا ئه‌ڤی وه‌لاتی، ل بیرا مه نه‌چیت وه‌لاتێ مه وهلاتهكێ وێرانبوو، ئه‌نفال یێ ب سه‌رێ مه هاتین، كیماباران یێ ب سه‌رێ مه هاتین، 5 هزار گوندێن مه یێن وێرانكرین، 182 هزار ئه‌نفالكری مه هه‌بووینه، ئاڤه‌دانكرنا وهلاتهكێ وێران كاره‌كێ گه‌له‌كێ ب زه‌حمه‌ته و بێنهه‌كا فره‌هـ دڤێت.
رۆژه‌كێ مه به‌حسێ هندێ دكر ئه‌م بكارین به‌س كا دێ چه‌وا شێین مووچه‌یێن خه‌لكی دابین بكه‌ین ئه‌ڤرۆ ئه‌م یێ به‌حسێ پڕۆژێن ستراتیجی دكه‌ین، به‌ری نها مه به‌رێ بنیاتێ پڕۆژێ باله‌فرا دهۆكێ دانا، ئه‌ڤرۆ ئه‌م هاتین به‌حسێ پڕۆژه‌یه‌كێ گه‌له‌كێ گرنگ دكه‌ین كو بهایێ 100 ملیۆن دۆلاران دێ تێدا هێنه خه‌رجكرن بۆ ڤێ ده‌ڤه‌رێ.
ئه‌ڤ پڕۆژه پڕۆژێن گرنگن، وهلاتهكێ وێران و بودجه‌یه‌كا كێم پێدڤی ب ته‌حموله‌كا زێده‌تر هه‌یه بۆ ئاڤه‌دانكرنا وی، هیڤییا من ئه‌وه ئه‌ز دیسان ببینم ل هه‌موو كوردستانێ هه‌ر ل زاخۆ و تا دگه‌هیته خانه‌قین سه‌رمایه‌دارێن مه زور ب جددی بكه‌ڤنه كار و پالپشتییا حوكمه‌تێ و ملله‌تێ خۆ بكه‌ن و ل شورشا ئاڤه‌دانكرنا وه‌لاتێ خۆ دا به‌شداربن.
رۆژه‌ك هه‌بوو پێشمه‌رگێن مه قه‌هره‌مانی كر، خه‌بات كر، خوین رێشت، ماندی بووین بۆ هندێ دا ئه‌ڤ ئازادییه بێته ده‌سته‌به‌ركرن، ده‌وله‌ت سه‌رێ خوینا وان شه‌هیدان و ده‌وله‌ت سه‌رێ وان عه‌زیزان و وان پێشمه‌ر‌گان، ئه‌ڤرۆ ئه‌م یێ ڤێ ئازادیێ دبینین، لێ ئه‌ڤرۆ به‌رپرساته‌یه‌كا دی یا ل سه‌ر ملێن مه، به‌رپرساتییا ئاڤه‌دانكرنا ڤی وه‌لاتی یه، ئه‌و سه‌رمایه‌دارێن ئه‌ڤرۆ دڤی وه‌لاتی دا، سه‌رمایێ خۆ بۆ پێشكه‌فتن و ئاڤه‌دانكرنا ئه‌ڤی وه‌لاتی بكاردئینین، بێ شك خه‌باتا وان د ئه‌ڤرۆ دا هیچ كێمتر نینه ل خه‌باتا وی پێشمه‌رگێ زه‌حمه‌ت كێشای و خه‌بات كری و د رۆژێن سه‌خت دا ماندی بووی و خوینا خۆ دای بۆ ئازادییا مه، ئه‌ڤرۆ شۆرشا مه شۆرشا ئاڤه‌دانكرنێ یه، شۆرشا پێشه‌ڤبرنێ یه، شۆرشا هندێ یه ئه‌م ڤی وه‌لاتێ وێران جاره‌كا دی ئه‌م هه‌مییێ ئاڤه‌دان بكه‌ین و هاریكارییا هه‌موو لایه‌كی پێدڤیی بۆ ڤێ ئاڤه‌دانیێ.
ئه‌ز جاره‌كا دی ده‌ستخۆشیێ ل هنگۆ دكه‌م و هیڤییا سه‌ركه‌فتنێ بۆ هنگۆ دخوازم، هیڤییا من ئه‌وه انشاء الله موفه‌ق و سه‌ركه‌فتی بن و زێده‌تر و زێده‌تر ئه‌ڤ پڕۆژه‌یێن وه‌كی ئه‌ڤرۆ ئه‌م ل ڤێره به‌رێ بنیاتێ وێ ددانین ل هه‌می پارچه‌یێن دی یێ كوردستانێ ئه‌م ڤان پرۆژان ببینین و هین موفه‌ق و سه‌ركه‌فتی بن و هه‌مو لایه‌ك بخێر بێن و سه‌رچاڤان.
