نێچیرڤان بارزانى: بەهیچ شێوەیەک ڕێگە نادەین کوردستان بەرەو دواوە بگەڕێندرێتەوە
سه‌رله‌به‌یانیى ئه‌مڕۆ دووشه‌مه 24ى ئه‌یلوولى 2012 له ڕێوره‌سمێکدا نێچیرڤان بارزانى سه‌رۆک وه‌زیرانى هه‌رێمى کوردستان به ئاماده‌بوونى ژماره‌یه‌ک وه‌زیر و په‌رله‌مانتار و کونسولى وڵاتانى بیانى له هه‌رێمى کوردستان به‌ردى بناغه‌ى فڕۆکه‌خانه‌ى نێوده‌وڵه‌تیى دهۆکى دانا.
له سه‌ره‌تاى ڕێوره‌سمه‌که‌دا عه‌دنان چێک سه‌رۆکى ئه‌نجومه‌نى کۆمپانیاى ماکیۆلى تورکى، له وته‌یه‌کیدا ئاماژه‌ى به گرنگى و بایه‌خى ئه‌نجامدانى پرۆژه‌که کرد. دواتر نێچیرڤان بارزانى وته‌یه‌کى پێشکه‌ش کرد و تیایدا باسى له گرنگیى فڕۆکه‌خانه‌که کرد و گوتى: ئه‌ڤڕۆ بۆ من و خه‌لکێ پارێزگه‌ها دهۆکێ، ڕۆژه‌کا تایبه‌ته، بۆ من ڕۆژه‌کا تایبه‌ته چونکی ل کابینا پێنجێ، من سۆز دابوو باله‌فڕخانه‌یه‌کا سه‌رده‌م بۆ پارێزگه‌ها دهۆکێ چێکه‌ین، ئه‌ڤڕۆ ئه‌و سۆزه من ب جی ئینا و ئه‌و ئه‌مانه‌ته ژ سه‌ر ملێ خۆ ڕاکر.
له به‌شێکى دیکه‌ى وته‌که‌یدا نێچیرڤان بارزانى ئه‌و پڕۆژه‌یه‌ى به پڕۆژه‌یه‌کى ستراتیژى بۆ پارێزگاى دهۆک و هه‌رێمى کوردستان، هه‌روه‌ها به ده‌روازه‌یه‌گى گرنگ به‌رامبه‌ر جیهان وه‌سف کرد و گوتى: ئه‌ڤ باله‌فڕخانه ته‌نها خزمه‌تا پارێزگه‌ها دهۆکێ و هه‌رێما کوردستانێ ناکه‌ت، دێ خزمه‌تا خه‌لکێ پارێزگه‌ها نینه‌ڤا (مووسل) ژی که‌ت، نه دووره ژی خزمه‌تا ده‌ڤه‌رێن سینۆری ل سووریا و ترکیا ژی بکه‌ت.
دواتر به‌ردى بناغه‌ى پرۆژه‌که له لایه‌ن سه‌رۆک وه‌زیرانه‌وه دانرا .
جێی باسه دیزاینى فرۆکه‌خانه‌ى نێوده‌وڵه‌تى دهۆک له لایه‌ن کۆمپانیاى (دار الهندسه) ى لوبنانى ADPI دانراوه و ته‌نده‌ره‌که‌ى بۆ کۆمپانیاى ماکیۆلى تورکى ده‌رچووه و له لایه‌ن تیمێکى فڕۆکه‌خانه‌ى ئێنجنى کۆریاى باشووره‌وه سه‌رپه‌رشتیى ته‌واوکردنى ده‌کرێت. ئه‌و پرۆژه‌یه به بڕی 400 ملیۆن دۆلار له سه‌ر ڕووبه‌رى 21 کیلۆمه‌تر چوارگۆشه دروست ده‌کرێت و بڕیاره له ماوه‌ى دوو ساڵ و نیودا ته‌واو ببێت و بکه‌وێته کار.
ئه‌مه‌ش ده‌قى وته‌ى نێچیرڤان بارزانى سه‌رۆک وه‌زیرانى هه‌رێمى کوردستانه له ڕێوڕه‌سمى داناى به‌ردى بناغه‌ى فڕۆکه‌خانه‌ى نێوده‌وڵه‌تیى دهۆکدا:
مێڤانێن زێده قه‌درگران هوون هه‌می ب خێر بێن سه‌ر چاڤان.
ئه‌ز گه‌له‌ک بخێر هاتنا کونسلێن بیانی ئه‌وێن ئه‌ڤرۆ دگه‌ل مه به‌شداربووین دکه‌م، کو ژ هه‌ڤلێرێ ته‌شریف ئینای بۆ ڤێره، تایبه‌تی ئه‌ز بخێرهاتنا وان دکه‌م، بخێر هاتنه‌کا گه‌رم ل وان دکه‌م کو ئه‌ڤ رێکا دیر بڕی و هاتین بۆ به‌شداریکرنێ د دانا به‌رێ بنیاتێ فرۆکخانه‌یا دهۆکێ دا، ئه‌ڤه ژى نیشانا به‌شدارییا وانه ل ئاڤه‌دانی و خۆشگوزه‌رانییا خه‌لکێ مه، بخێر بێن سه‌رچاڤان.
بخێرهاتنه‌کا گه‌رم ل ئه‌ندامێ په‌رله‌مانێ ئیراقا فیدرال دکه‌م کو ئه‌ڤرۆ ته‌شریف ئینای بۆ ڤێرێ، بخێر هاتنا بریکارێ وه‌زیری ڤه‌گوهاستنا ئیراقێ دکه‌م، وه‌زیر و بریکارێن وه‌زیرێن حوکمه‌تا هه‌رێما کوردستانێ هه‌میی بخێر بێن سه‌رچاڤان گه‌له‌ک بخێر بێن.
ئه‌ڤرۆ بۆ من و خه‌لکێ پارێزگه‌ها دهۆکێ، رۆژه‌کا تایبه‌ته.
بۆ من رۆژه‌کا تایبه‌ته چونکى ل کابینا پێنجێ، من سۆزدابوو باله‌فڕخانه‌یه‌کا سه‌رده‌م بۆ پارێزگه‌ها دهۆکێ چێکه‌ین، ئه‌ڤرۆ ئه‌و سۆزه من ب جى ئینا و ئه‌و ئه‌مانه‌ته ژ سه‌ر ملێ خۆ راکر.
بۆ هه‌وه ژى رۆژه‌کا تایبه‌ته، چونکى ئه‌ڤه ژمێژه خه‌لکێ پارێزگه‌هێ داخوازا باله‌فڕخانه‌یه‌کێ دکه‌ن و گه‌له‌ک جاران ب گازنده‌ڤه دگۆتن؛ بۆچى به‌س پارێزگه‌ها مه باله‌فڕخانه نینه؟!
چونکى ئه‌و گازنده، گازنده‌یه‌کا ره‌وا بوو،له‌و هه‌ر ل بیرا مه بوو، تاکو ئه‌ڤ رۆژه هاتى و خه‌ون بوویه هیڤى و هیڤى بوویه پرۆژه.
ئه‌ڤرۆ ئه‌م هه‌مى گه‌هشتینه ئارمانجه‌کا هه‌ڤپشک. بۆ مه هه‌میان و بۆ پارێزگه‌ها دهۆکا خۆشتڤی و هه‌می کوردستانێ ئه‌ڤ پرۆژه پیرۆز بیت.
به‌رێزان
نه زۆر ژ مێژه‌یه، ئه‌م ژ ناڤ دووکێلا چه‌کێن کێمیایى و ئه‌نفالان ده‌رکه‌ڤتین. ل بیرا مه‌یه، مه ئاڤا پاکژ بۆ ڤه‌خوارنێ نه‌بوو.
پرانییا رێکێن کوردستانێ رێکێن له‌شکرى بوون.
گوندێن مه هه‌مى هاتبوونه وێرانکرن.
تاکو سالا 2003 رژێما سه‌دامى گه‌ف ل هه‌بوونا ملله‌تێ مه دکر.
تێکه‌لیێن مه دگه‌ل دنیایێ ب رێکا ده‌وله‌تێن جیران بوون.
ئه‌ڤ ئه‌ردێ دێ بته باله‌فڕخانه، هه‌م هاتبوو عه‌ره‌بکرن، هه‌م باره‌گه‌هه‌کێ له‌شکرێ ئیراقێ بوو، بۆ راوه‌ستاندن و بێده‌نگ کرنا هه‌ر داخوازه‌کا ره‌وا یا ملله‌تێ مه.
لێ خه‌بات و خوه‌راگرى یا خه‌لکێ کوردستانێ، و پشته‌ڤانى یا دۆستێن گه‌لێ مه ل جیهانێ ئه‌م گه‌هاندینه ئه‌و رۆژا به‌رێ بنیاتى بۆ باله‌فڕخانه‌یه‌کا نێڤده‌وله‌تى ل پارێزگه‌ها دهۆکێ ژى دانین و بڤی ره‌نگی هه‌مى پارێزگه‌هێن هه‌رێمێ بوونه خودان فڕۆکه‌خانه. ئه‌ڤه ده‌ستکه‌فته‌کا نه‌ته‌وه‌ییه، به‌رى پرۆژه‌یه‌کێ ستراتیجى بیت بۆ پارێزگه‌ها دهۆکێ.
هه‌روه‌سا، ئه‌ڤ پرۆژه نیشانا بڕینا قۆناغه‌کا مه‌زنه ل ئاڤه‌دانى و پێشکه‌ڤتنا وه‌لاتێ مه، نیشانا دیتنه‌کا پاشه‌رۆژیه بۆ گرێدانا پارێزگه‌هێن هه‌رێمێ پێکڤه و گرێدانا هه‌رێمێ ب ئیراقێ و دنیایێ ڤه، ب رێکا هێلێن ئاسمانى.
ئه‌ڤ پرۆژه نیشانا ده‌ربازبوونا پارێزگه‌ها دهۆکێ یه ژ قۆناغا پێشکێشکرنا خزمه‌تێن ژیانا رۆژانه بۆ خه‌لکێ پارێزگه‌هێ، به‌ره‌ڤ پرۆژه‌یێن ستراتیجى ل ڤێ ده‌ڤه‌رێ. کو هه‌م خزمه‌تا که‌رتێن ئابۆرى و بازرگانى و گه‌شتیارى بکه‌ت، هه‌م دێ پارێزگه‌هێ ب دنیایێڤه گرێ ده‌ت و دهۆک دێ بته پره‌کا دى ل ناڤبه‌را هه‌رێما کوردستانێ و جیهانێ.
هه‌روه‌سا دێ خزمه‌تا ره‌ڤه‌ندا کوردستانى ل ده‌رڤه که‌ت کو ب سانه‌هیتر هه‌ڤبه‌ندى و تێکه‌لیێ ب وه‌لاتى بکه‌ن. ئه‌ڤه دێ خزمه‌تا وان و هه‌رێمێ که‌ت، کو پتر بشێن پشکدارى ئاڤه‌دانى و پێشدابرنا هه‌رێمێ ببن و رۆلێ خوه باشتر بگێڕن بۆ ئاڤه‌دانکرنا کوردستانێ.
ئه‌ڤ باله‌فڕخانه، دێ خزمه‌تا که‌رتێ گه‌شتیارى ژى که‌ت و ئه‌م پێشبینیا پێنگاڤه‌کا مه‌زن ل ئه‌ڤى که‌رتى دکه‌ین ل ده‌ڤه‌رێ.
ل که‌رتێ بازرگانى و وه‌به‌رهێنانێ، رۆلێ فرۆکه‌خانێ دێ هێشتا به‌رچاڤتر بت.
ئه‌ڤانه هه‌مى، دێ خزمه‌تا خه‌لکێ مه یێ خۆشتڤى ل پارێزگه‌ها دهۆکێ که‌ن و ئه‌ز پێشبینى دکه‌م، باله‌فڕخانا دهۆکێ دێ هه‌مى بیاڤێن ژیانێ زیندى که‌ت و پێشدا به‌ت ل ده‌ڤه‌را دهۆکێ.
به‌رێزان
پێشکه‌ڤتنا هه‌رێمێ ل ئه‌ڤان سالێن بۆرین، و ده‌ربازبوونا کارێ حوکمه‌تێ ژ خزمه‌تگوزاریێن رۆژانه بۆ پرۆژه‌یێن ستراتیجى و ژێرخانى، راستیه‌کێ بۆ مه ئاشکرا دکه‌ن، کو هه‌ر ملله‌ته‌کێ بڕیارا خۆ هه‌بت، دێ شێت وه‌لاتێ خۆ ئاڤا که‌ت.
وه‌ختێ بڕیارا مه ب ده‌ستێ خه‌لکێ دى بوو، وه‌لاتێ مه دهاته وێران کرن.
خه‌لکێ مه لبه‌ر سته‌م و زۆرداریێ بوو. ئه‌ڤرۆ، ده‌وله‌ت سه‌رێ خه‌باتا پێشمه‌رگه و ملله‌تێ مه، ده‌وله‌ت سه‌رێ خوینا شه‌هیدێن مه، ده‌وله‌ت سه‌رێ خه‌لکێ خوه‌راگرێ کوردستانێ، پشتى سه‌رهلدانێ تاکو نه‌مانا رژێمێ ل به‌غدا.. ئه‌م ئازادین و دێ وه‌لاتێ خوه ئاڤاکه‌ین.
ئێدى ئه‌م ب هیچ شێوه‌یه‌کى رازى نابین پاشڤه ڤه‌گه‌ڕین. ملله‌تێ مه ژى قبوول ناکه‌ت راوه‌ستین یان پاشدا بچین. پشتى ده‌هان سالێن خه‌باتێ، و هه‌زاران شه‌هیدان. ژبلى پێشکه‌ڤتنێ و ئاڤه‌دانیێ و شارستانیێ، مه هیچ رێیه‌کا دى نینه.
مه وه‌لاتێ خوه ب خوینا قه‌هره‌مانێن خۆ ئازادکریه، دێ شه‌ڤ و رۆژان که‌ینه ئێک دێ باشتر و زووتر ئه‌ڤى وه‌لاتى ئاڤاکه‌ین. ئه‌ڤه سۆزه‌که دده‌ینه شه‌هیدێن خۆ، دده‌ینه هه‌ر که‌سه‌کێ دلۆپه‌کا خوهێ بۆ ئازادیا کوردستان رشت بت. ئه‌م پاشگه‌ز نابین ژ هیچ پێنگاڤه‌کێ، خزمه‌تا ملله‌تێ مه تێدا بت، ئه‌م پاشه‌رۆژه‌کا روناک بۆ خه‌لکێ کوردستانێ دبینین.
ئه‌ڤ پرۆژه، خه‌له‌کا ئێکێ یه ژ زنجیره‌کا دوور و درێژ ژ پرۆژه‌یێن ستراتیجى. ئه‌ڤرۆ به‌رێ بنیاتى بۆ ئه‌ڤى پرۆژێ ستراتیجى دێ دانین.
پشتى ده‌مه‌کێ دى، دێ به‌رێ بنیاتى بۆ پرۆژه‌یه‌کێ دى یێ ستراتیجى ل پارێزگه‌ها دهۆکێ دانین، ئه‌و ژى پرۆژێ پالاوگه‌ها نه‌فتێ یه، کو دشێت ل پاشه‌رۆژێ به‌رفره‌هـ ببیت و ببیته کارگه‌ها که‌رسته‌یێن پترۆکێمیایى ل ڤێ ده‌ڤه‌رێ.
ده‌ڤه‌را بازرگانیا ئازاد ل زاخۆ دێ بیته بازاڕه‌کێ ناڤده‌وله‌تى، ئه‌و ژى دێ ب هه‌زاران ده‌لیڤه‌یێن کارى په‌یدا که‌ت و دێ بیته سه‌نته‌ره‌کێ چێکرنا هه‌ڤبه‌ندیێن بازرگانى ل سێگۆشه‌یا سنۆرى، و دێ ئاشتیێ و پێکڤه‌ژیانێ ل ده‌ڤه‌رێ جهگیر که‌ت.
به‌رێزان
باله‌فڕخانه بۆ هه‌رێمه‌کا دائێخستى وه‌کو کوردستانێ، جهێ به‌نده‌رێن ده‌ریایی دگریت. هه‌ر باله‌فڕخانه‌یه‌کا ل کوردستانێ ئاڤا دبیت، بۆ مه، ته‌نها به‌نده‌ره‌کێ ئاسمانى نینه، بۆ مه رێیه‌کا سنۆربڕه مه ب دنیایێڤه گرێ دده‌ت.
به‌رێ دگۆتن، کوردستان وه‌لاته‌کێ داخستیه، له‌و بێ پشته‌ڤانه و پێش ناکه‌ڤت، ئه‌زموونا کوردستانێ ل سالێن بۆرین، خه‌له‌تیا ئه‌ڤێ بۆچۆنێ دیار کر. ئاڤاکرنا باله‌فڕخانه‌یان ل هه‌مى پارێزگه‌هێن هه‌رێمێ، رێکه‌که بۆ ڤه‌بوونێ لسه‌ر دنیایا ده‌رڤه.
رێکه‌که ئه‌م وه‌لاته‌کێ داخستى دگه‌ل هه‌مى دنیایێ ڤه‌که‌ین.
هه‌روه‌سا، باله‌فڕخانه‌یا دهۆکێ دێ بته هێله‌کا ئاسمانى ل ناڤبه‌را پارێزگه‌هێن هه‌رێمێ. ب ئه‌ڤێ باله‌فڕخانێ ئه‌م دشێین هزرا خورتکرن و به‌رفره‌هکرنا هێلێن ئاسمانیێن ناڤخوه‌یى ژى بکه‌ین، نه‌خاسمه ل ناڤبه‌را پارێزگه‌هێن ژێک دوور، وه‌کو دهۆکێ و سلێمانیێ. یان ل ناڤبه‌را پارێزگه‌هێن هه‌رێمێ و ئیراقێ.
بێ شک ئه‌ڤ باله‌فڕخانه ته‌نها خزمه‌تا پارێزگه‌ها دهۆکێ و هه‌رێما کوردستانێ ناکه‌ت، دێ خزمه‌تا خه‌لکێ پارێزگه‌ها نینه‌ڤا (مووسل) ژى که‌ت.
هێژ دوورتر، نه‌دووره خزمه‌تا ده‌ڤه‌رێن سینۆرى ل سووریا و تورکیا ژى بکه‌ت، نه‌خاسمه ئه‌و جهێن دوورى باله‌فڕخانێ نه.
ئه‌ڤه ژى سووده‌کا دى یه، باله‌فڕخانه‌یێن هه‌رێمێ ب هه‌ردو ده‌وله‌تێن جیران ڤه گرێ بده‌ت و هه‌ڤبه‌ندیێن مه دگه‌ل وان خورتتر لێ بکه‌ت و خزمه‌تا هه‌ڤبه‌ندیێن جڤاکى ژى بکه‌ت ل ده‌ڤه‌رێ.
ل دوماهیێ من دڤێت ب ناڤێ حوکمه‌تا هه‌رێمێ و خه‌لکێ پارێزگه‌ها دهۆکێ سوپاسى یا وه‌زاره‌تا ڤه‌گوهاستنێ ل حوکمه‌تا فیدرال بکه‌م؛ جه‌نابێ وه‌زیرى و جێگرێ وه‌زیری و هه‌می کادرێ وه‌زاره‌تێ، کو بێیى هاریکارى و پشته‌ڤانى یا وان، ئه‌ڤ پرۆژه دا گه‌له‌ک گیرۆ بیت. هه‌روه‌سا کۆمپانیا (دار الهندسه) یا لوبنانی کو دیزاینا ئه‌ڤێ فرۆکه‌خانێ دانایه، دگه‌لدا سوپاسییه‌کا گه‌رم ل کۆمپانیا ADPI دکه‌م.
هه‌روه‌سا هیڤیا سه‌رکه‌ڤتنێ بۆ کۆمپانیا ماکیۆل دکه‌م کو ته‌نده‌رێ ئاڤاکرنێ بۆ که‌ڤتیه.. هیڤیدارم ب زووترین وه‌خت و باشترین شێوه ئه‌ڤى پرۆژه‌ى ئه‌نجام بده‌ن.
دیسا سوپاسیه‌کا تایبه‌ت بۆ تیمێ فرۆکه‌خانا ئنێجن ژ کۆریا باشۆر دکه‌م کو دێ سه‌رپه‌رشتیێ ل ڤی پڕۆژه‌ی که‌ن.
به‌رهه‌مێ ئه‌ڤان هه‌مى هه‌ڤکاران دێ بته باله‌فڕخانه بۆ خه‌لکێ پارێزگه‌ها دهۆکێ. ئه‌م دێ ل هیڤیا ئه‌وێ رۆژێ بین، پێکڤه شرینیا ئه‌نجامدانا ئه‌ڤێ پڕۆژێ بخۆین.
جاره‌کا دى، سوپاس بۆ هه‌می لایه‌کى و هوون هه‌می بخێربێن سه‌رچاڤان و سه‌ر سه‌ران.
