یه‌كێتیى زانایانى ئایینى ئیسلامى كوردستان ناڕه‌زایى خۆى گه‌یانده كونسوڵى ئه‌مه‌ریكا له هه‌ولێر
دوای ئه‌وه‌ی له یازده‌ی سپتێمبه‌ر فلیمێك له ئه‌مریكا نمایش كرا كه تیایدا سوكایه‌تی به پێغه‌مبه‌ری ئیسلام درودى خواى له‌سه‌ر بێت كرا، له به‌رامبه‌ریشدا ئه‌م كاره له جیهانی ئیسلامیدا ناره‌زایی جیا جیای لێ كه‌وته‌وه بۆ ئه‌م مه‌به‌سته‌ش یه‌كێتی زانایانی ئاینی ئیسلامیی كوردستان به‌یاننامه‌یه‌كی ناره‌زاییان ئاراسته‌ی كۆنسۆلخانه‌ی ئه‌مریكا له هه‌ولێر كرد.
هه‌روه‌ها به مه‌به‌ستی به دواداچوونی ئه‌م به‌یانامه‌یه پۆڵ سته‌یڤن كونسولی گشتی ئه‌مریكا له هه‌ولێر سه‌ره‌دانی یه‌كێتی زانایانی ئاینی ئیسلامی كوردستانی كردو بۆ ئه‌م مه‌به‌سته‌ش كوبونه‌وه‌یه‌كی له‌گه‌ڵ ستافی مه‌كته‌بی ته‌نفیزی یه‌كێتی زانایانی ئاینی ئیسلامی كوردستان ئه‌نجام دا له لێدوانێكی رۆژنامه‌وانیدا مه‌لا عه‌بدوڵڵا سه‌عید سه‌رۆكی یه‌كێتی زانایانی ئاینی ئیسلامی كوردستان ورده‌كاری زیاتری خسته روو . هه‌روه‌ها ده‌رباره‌ی فیلمی سوكایه‌تیكردن به پێغه‌مبه‌ر درودی خوای له‌سه‌ر بێت ، یه‌كێتی زانایان به‌یاننامه‌یه‌كى ده‌كردووه ، كه ئه‌مه‌ش ده‌قه‌كه‌یه‌تى :-
به‌ناوی خوای به‌خشنده‌ی میهره‌بان
له یادی 11 سپتێمبه‌ری رووداوه‌كانی ئه‌مه‌ریكا، كۆمه‌ڵێك كه‌سی نامه‌سئول له وڵاته‌كانی ئه‌مه‌ریكا هه‌ڵستاون به ده‌ركردنی فیلمێك‌و، له‌م رۆژه‌دا بڵاویان كردۆته‌وه‌‌و، تێیدا داوا ده‌كه‌ن پێغه‌مبه‌ری ئیسلام دادگایی بكرێت.
ئێمه له یه‌كێتی زانایانی ئایینی ئیسلامی كوردستان به بیستنی ئه‌م هه‌واڵه دنیایه‌ك نیگه‌ران بووین‌و، سه‌رمان سوڕما له‌و تێڕوانینه نا مه‌سئولانه دوور له هه‌موو بنه‌ما ئه‌خلاقیه‌كان، چونكه هه‌موو كه‌سێكی خوێنده‌وار ده‌زانێت پێغه‌مبه‌ری ئیسلام هه‌میشه هه‌ڵگری په‌یامی ئاشتی‌و پێكه‌وه‌ژیان بوو، به درێژایی مێژووی ئیسلامیش ئه‌م پێكه‌وه‌ژیانه به‌رده‌وام بووه.
بۆیه به تووندی ئیدانه‌ی ئه‌م كاره قێزه‌ونه ده‌كه‌ین‌و، پێویسته وڵاتانی رۆژئاواش چیدیكه به ناوی ئازادی راده‌ربڕینه‌وه، رێگه‌نه‌ده‌ن كه‌سانێكی نه‌فس نزم‌و دوور له هه‌ستكردن به به‌رپرسیارێتی به‌م جۆره كارانه هه‌ڵستن، چونكه ئه‌م كارانه وێڕای ئه‌وه‌ی دڵی موسڵمانان بریندار ده‌كات، كه پێغه‌مبه‌ری خۆشه‌ویستمان له هه‌موو كه‌س‌و كارمان خۆشتر ده‌وێت، له هه‌مان كاتدا تۆوی رق‌و كینه پتر بڵاوده‌كه‌نه‌وه‌‌و، رۆحی خۆشه‌ویستی‌و پێكه‌وه‌ژیان لاواز ده‌كه‌ن. هه‌روه‌ك ده‌نگی خۆمان ده‌خه‌ینه پاڵ ئه‌و ده‌نگانه‌ی داوای راگرتنی ئه‌م فیلمه ده‌كه‌ن‌و، ده‌یانه‌وێت چیدیكه رێگه نه‌درێت به هه‌ر بیانووێكه‌وه سوكایه‌تی به پیرۆزییه‌كان نه‌كرێت.
هه‌ر لێره‌شه‌وه داواكارین موسڵمانان پارێزگاری له هه‌ڵوێستی ئاشتیانه‌‌و شه‌رعیانه‌ی خۆیان بكه‌ن‌و، تووشی جۆره هه‌ڵوێستێك نه‌بن، زیانی پتر بێت، كه له سنووری دروستی خۆی نه‌بێت یان كه‌سانێكی بێ تاوان بكرێنه قوربانی، باشترین وه‌ڵامیش نزیكبوونه‌وه‌ی زیاتر‌و پابه‌ندبوون‌و شاره‌زابوون‌و كاركردنی زیاتره بۆ خزمه‌تی په‌یامی پێغه‌مبه‌ر درودی خوای له‌سه‌ر بێت، له‌سه‌ر هه‌موو ئاسته‌كانی خواپه‌رستی‌و رۆشنبیری‌و خوێندنه‌وه‌‌و خۆشاره‌زاكردن‌و نووسین‌و هونه‌ری‌و بانگه‌وازیكردن.
