سه‌رۆكایه‌تیی هه‌رێمى كوردستان: ده‌رچوونى بڕیارى له‌سێداره‌دان بۆ هاشمى، ته‌نگژه‌كه ئاڵۆزتر ده‌كات
له‌باره‌ى بریارێكى قه‌زا دژى به‌ڕێز تاریق هاشمى جێگرى سه‌رۆك كۆمارى عێراقى فیدراڵ گوته‌بێژى فه‌رمى سه‌رۆكایه‌تى هه‌رێمى كوردستان ئه‌م راگه‌یاندنه‌ى دا :
سه‌ربه‌خۆیی قه‌زا و رێزگرتن له بڕیاره‌كانى ئه‌ركى هه‌مووانه و ده‌بێ قه‌زا بێلایه‌ن بێت و لایه‌نگیر نه‌بێت.
ده‌رچوونى بڕیارى له سێداره‌دان به غیابى دژى به‌ڕێز تاریق هاشمى جێگرى سه‌رۆك كۆمار له‌م بارودۆخه گرژ و هه‌ستیاره‌ى عێراق پێیدا تێپه‌ڕ ده‌بێ، مایه‌ى نیگه‌رانییه و ته‌نگژه‌كه ئالۆزتر ده‌كات، كه له بنه‌ڕه‌تدا ماوه‌یه‌كه عێراق گیرۆده‌ى بووه. ره‌نگه زه‌مینه‌ش بۆ ناكۆكى تاڵى تایفی بڕه‌خسێنێ.
داوا له هه‌موو لایه‌نه‌كان ده‌كه‌ین به حیكمه‌ت و دوور له هه‌ڵچوون و ته‌سفیه‌ى حساباته‌وه چاره‌سه‌رى ئه‌م كێشه‌یه بكه‌ن.
گوته‌بێژى فه‌رمى سه‌رۆكایه‌تى هه‌رێمى كوردستان
10/9/2012
