نێچیرڤان بارزانى: دیالۆگ و پایه‌ندبوون به ده‌ستوور، تاکه چاره‌سه‌ره
ئێواره‌ى دوێنێ چوارشه‌ممه 5ى ئه‌یلوولى 2012، نێچیرڤان بارزانى سه‌رۆكى حكوومه‌تى هه‌رێمى كوردستان، پێشوازى له شاندێكى باڵاى کۆنگرێسى ئه‌مه‌ریکا کرد كه له سیناتۆر جۆن مه‌کیین، سیناتۆر جۆ لێبرمان و سیناتۆر لیندزى گراهام پێكهاتبوو.
له دیدارێكدا كه د.فوئاد حوسێن سه‌رۆكى دیوانى سه‌رۆكایه‌تیى هه‌رێم، د.ئاشتى هه‌ورامى وه‌زیرى سامانه سروشتییه‌كان، فه‌لاح مسته‌فا به‌رپرسى فه‌رمانگه‌ى په‌یوه‌ندییه‌كانى ده‌ره‌وه‌ى حكوومه‌تى هه‌رێم و قوباد تاڵه‌بانى ئاماده‌یى بوون، شاندى میوان خۆشحاڵیى خۆیان به‌م سه‌ردانه‌یان بۆ هه‌رێمى كوردستان و ئه‌و پێشكه‌وتنانه‌ى هه‌رێمى كوردستان به خۆیه‌وه‌ى بینیوه، نیشان دا و ده‌ستخۆشییان له سه‌ركردایه‌تیى كوردستان كرد بۆ ئه‌و هه‌موو پێشكه‌وتن و بنیاتنان و ئاوه‌دانى و سه‌قامگیرى و ئارامییه‌ى له هه‌رێمى كوردستان هه‌یه و هیوایان خواست له‌مڕووه‌وه به‌شه‌كانى دیكه‌ى عیراقیش بگه‌نه ئه‌و ئاسته‌ى هه‌رێمى كوردستان.
لاى خۆیه‌وه سه‌رۆكى حكوومه‌تى هه‌رێمى كوردستان خۆشحاڵیى خۆى بۆ ئه‌م سه‌ردانه‌ى شاندى باڵاى كۆنگرێسى ئه‌مه‌ریكا ده‌ربڕى و هیواى خواست كه ئه‌م سه‌ردانانه بۆ هه‌رێمى كوردستان به‌رده‌وام بن و ببنه ڕێخۆشكه‌رێك بۆ بره‌ودانى زیاتر به په‌یوه‌ندیى نێوان ئه‌مه‌ریكا و هه‌رێمى كوردستان و عیراق.
پرسه سیاسییه‌كانى عیراق و ئه‌و كێشه و گرفتانه‌ى عێراقى پێدا ده‌ڕوات كه بوونه‌ته ڕێگر له‌به‌رده‌م پێشكه‌وتنى سیاسیى عیراق، لایه‌نێكى دیكه‌ى دیدارى هه‌ردوولا بوو. له‌مباره‌یه‌وه تیشك خرایه سه‌ر ڕۆڵى هه‌رێمى كوردستان كه هه‌میشه هه‌وڵى داوه عیراق ئارام و سه‌قامگیر بێت و له چوارچێوه‌ى ئه‌م هه‌وڵانه‌ى هه‌رێمى كوردستاندا، ڕێككه‌وتنى هه‌ولێر هاته ئاراوه كه حكوومه‌تى عیراقى له سه‌ر دامه‌زرا، به‌ڵام به هۆى پابه‌ندنه‌بوون به‌م ڕێككه‌وتنه‌وه، عیراق كه‌وته ناو كێشه و ئاسته‌نگى سیاسییه‌وه و هاوبه‌شیى ڕاسته‌قینه له ده‌سه‌ڵات و پابه‌ندبوون به ده‌ستوور و مادده ده‌ستوورییه‌كان و دیموكراسییه‌وه پشتگوێ خرا و كۆمه‌ڵێ یاساى وه‌ك یاساى نه‌وت و گاز و یاساى دابه‌شكردنى داهاته‌كان، په‌سند نه‌كران .
له‌مباره‌یه‌وه نێچیرڤان بارزانى ئاماژه‌ى به‌وه دا كه هه‌رێمى كوردستان هه‌میشه به بڕوایه‌كى ته‌واو به ده‌ستوور و ڕێككه‌وتنه‌كانه‌وه هه‌نگاوى ناوه و گفتوگۆ و دیالۆگ و گه‌ڕاوه‌نه‌ى بۆ ده‌ستوور، به تاکه ڕێگه بۆ چاره‌سه‌رى كێشه سیاسییه‌كانى عێراق له قه‌ڵه‌م دا. سه‌رۆكى حكوومه‌ت هه‌روه‌ها ڕایگه‌یاند كه له ڕه‌وشێكى وه‌كوو عیراقدا ئاسایى یه كێشه و گرفت بێنه ئاراوه، به‌ڵام گرنگ ئه‌وه‌یه ئیراده هه‌بێت بۆ چاره‌سه‌ركردنى كێشه‌كان به ڕێگه‌ى دیالۆگ و گه‌ڕانه‌وه بۆ ده‌ستوور، بۆ ئه‌وه‌ى سه‌قامگیرى بگه‌ڕێته‌وه بۆ عیراق و خزمه‌تگوزارى پێشكه‌ش به هاووڵاتیانى عیراق بكرێت.
هه‌ر له دیداره‌كه‌دا ڕه‌وش و پێشهاته‌كانى سووریا خرانه به‌ر باس؛ كه كاریگه‌رى له سه‌ر ته‌واوى ناوچه‌كه و به تایبه‌تى وڵاتانى ده‌وروبه‌ر هه‌یه. له‌مباره‌یه‌وه سه‌رۆكى حكوومه‌تى هه‌رێمى كوردستان ڕایگه‌یاند ڕه‌وش و پێشهاته‌كانى سووریا بۆ هه‌رێمى كوردستان جێگه‌ى بایه‌خن و هه‌رێمى كوردستان له‌گه‌ڵ ئه‌وه‌دایه كه گه‌لانى سووریا بڕیار له سه‌ر داهاتووى خۆیان بده‌ن و هه‌ر گۆڕانگارییه‌ك له سووریا بێته ئاراوه، گۆڕانكارییه‌كى دیموكراسى بێت كه تیایدا هه‌موو گه‌لانى سووریا و به تایبه‌تیش گه‌لى كورد به مافه‌كانى شاد بێت.
له كۆتایى دیداره‌كه‌دا شاندى میوان جه‌ختیان له سه‌ر دۆستایه‌تیى ئه‌مه‌ریكا بۆ گه‌لى كورد و به‌رده‌وامى و بره‌ودان به په‌یوه‌ندیى دووقۆڵیى نێوان هه‌ردوولا كرده‌وه و هیوایان خواست چیرۆكى سه‌ركه‌وتن له هه‌رێمى كوردستان ببێته چیرۆكى سه‌ركه‌وتن له هه‌موو عیراق و كێشه‌كانى نێوان هه‌رێم و به‌غدا به پێى ده‌ستوور و به شێوه‌یه‌ك كه له به‌رژوه‌ندیى ته‌واوى عیراقدا بێت، چاره‌سه‌ر ببن.
