ڕۆژانی جەژن 150 كەس بوونەتە قوربانی
لە رۆژانی پشووی جەژنی رەمەزاندا، 150 كەس بە هۆی رووداوی هاتوچۆوە بوونە قوربانی. هاوكات لە سەرەتای ئەمساڵیشەوە تا مانگی هەشت، 650 كەس بە هۆی رووداوی هاتوچۆوە گیانیان سپاردووە و بە هەزاران كەسیش بریندار و كەمئەندام بوون.
بەڕێوەبەری ڕاگەیاندن و پێوەندییەكانی هاوچۆی هەرێم عەمید قادر سدیق راگەیاند كە لە رۆژانی جەژندا 150 كەس بە هۆی رووداوی هاتوچۆوە بوونەتە قوربانی كە 10 كەس گیانیان لە دەست داوە و 140 هاووڵاتییش زامدار بوون.
ئەو هۆكاری ئەو رێژە زۆرەیشی، بۆ تیژڕۆیی شوفێران و لەبەرچاونەگرتنی هێماكانی هاتوچۆ گەڕاندەوە. عەمید قادر هەروەها گوتیشی كە لە رۆژانی جەژندا، هاووڵاتیان بۆ سەردانیكردنی كەسوكاریان سنووری شارەكان دەبڕن و هاوكات گەشتیارێكی زۆریش لە شەقامەكاندا هەن، هەموو ئەوانە و تیژڕۆیی شوفێران، ئەو كارەساتانەی لێ كەوتووەتەوە.
بەڕێوەبەری راگەیاندنی بەرێوەبەرایەتیی هاتوچۆی هەرێم، ئاشكرایشی كرد كە لەو 8 مانگەی كە لە 2012 تێپەڕیوە، 650 كەس بە هۆی رووداوی هاتوچۆوە گیانیان لە دەست داوە و بە هەزاران كەسیش بریندار و كەمئەندام بوون، ئەمە جگە لەوەی كە زیانێكی ماددیی یەكجار زۆریشی لێ كەوتووەتەوە.
