كوردی سووریا پێشنیاز بۆ چارەسەركردنی دۆزەكەیان دەخەنە روو
محەمەد مووسا محەمەد ئەندامی لێژنەی پێوەندییەكانی دەرەوە لە ئەنجوومەنی نیشتمانیی كوردی سووریا دووپاتی كردەوە كە لە ماوەی دوو رۆژی رابردوودا شاندێكی كوردی بەشداری لە كۆبوونەوەی بەرهەڵستكارانی سووریا لە قاهیرە كردووە و چەند پێشنیازێكی بۆ چارەسەركردنی دۆزی كورد لەو وڵاتە پێشكێشی كۆبەندی عەرەبی كردووە.
محەمەد لە كۆنگرەیەكی رۆژنامەوانیی هاوبەش لەگەڵ نەبیل عەرەبی ئەمینداری گشتیی كۆبەندی عەرەبی لە كۆتای كۆبوونەوەكەدا گوتی، كورد پێكهاتەیەكی سەرەكیی گەلی سووریایە و مافەكانمان لە چوارچێوەی نیشتمانی سووریا دێتە دێ.
زیاتر گوتی، ئەمڕۆ لەگەڵ نەبیل عەرەبیدا تاوەتوێی پوختەی كۆبوونەوەكەی دوو رۆژی رابردووی بەرهەڵستكارانی سووریامان كرد و ئاماژەی كرد، گەیشتینە ئەنجامی پێویستی هاوئاهەنگی لە نێوان بەرهەڵستكارانی دەرەوە و ناوەوەی سووریا.
محەمەد روونی كردەوە، داوامان لە كۆبەندی عەرەب كرد پاڵپشتی لە بەرهەڵستكاران بكا بۆ گەیشتن بە سەركەوتن و چەند پێشنیازێكمان بۆ چارەسەركردنی دۆزی كورد لەو وڵاتە پێشكێشی كۆبەندی عەرەبی كردووە.
لە حوزەیران/یۆنیۆی رابردوودا كوردی سووریا لە كۆنگرەی بەرهەڵستكارانی سووریا لە قاهیرە پاشەكشەیان كرد بەهۆی وەڵامنەدانەوەی داواكانیان.
