سكرتێرى مه‌كته‌بى سیاسیى (پ.د.ك) پێشوازیى له شاندى پارتى گه‌لى ده‌سه‌ڵاتدارى ئیسپانى كرد
ئه‌مرۆ له باره‌گاى مه‌كته‌بى سیاسى له سه‌لاحه‌ددین فازل میرانى سكرتێرى مه‌كته‌بى سیاسى پارتى دیموكراتى كوردستان پێشوازى له ئالبێرتۆ ڕۆیز به‌رپرسى په‌یوه‌ندییه‌كانى ده‌ره‌وه‌ى پارتى گه‌لى فه‌رمانڕه‌وایى ئیسپانى و جێگرى سكرتێرى سى دى ئاى كه له سه‌ر بانگهێشتى فه‌رمى مه‌كته‌بى په‌یوه‌ندیه‌كانى ده‌ره‌وه‌ى پارتى دیموكراتى كوردستان هاتۆته كوردستان. له دانیشتنێكدا كه هێمن هه‌ورامى به‌رپرسى مه‌كته‌بى په‌یوه‌ندیه‌كانى ده‌ره‌وه‌ى پارتى دیموكراتى كوردستان ئاماده‌ى بوو، فازل میرانى باسى له په‌یوه‌ندیه‌كانى پارتى دیموكراتى كوردستان و ئیسپانیا له پاش ڕاپه‌ڕینى ساڵى هه‌زارو نۆسه‌دو نه‌وه‌دو یه‌ك كه هێزه‌كانى ئیسپانى به به‌شدارى له‌گه‌ڵ هێزى هاوپه‌یمانان له كوردستان هاوكارییان پێشكه‌شى خه‌ڵكى كوردستان كرد بۆ بنیاتنانى قوتابخانه و نه‌خۆشخانه له كوردستان و هه‌روه‌ها سوپاسگوزارى پارتى دیموكراتى كوردستان بۆ گه‌ل و ووڵاتى ئیسپانییا بۆ ئه‌و كارانه‌یان له ساڵانه‌دا ده‌ربڕى.
پشتره میرانى ل سه‌ر ره‌وشا ئیرۆ یا ئیراقێ ب گشتى و یا هه‌رێما كوردستانێ ب تایبه‌تی راوه‌ستیا و گۆت هه‌تا نها ژى ل ئیراقێ هزرا وه‌لاتیێ پله یه‌ك و پله دو هه‌یه كو یه‌ك ژ پاشمایێن هزرا رژێما به‌عس یا رووخیایى یه و یه‌ك ژ وان گرفتارى یێن سه‌ره‌كه یه كو راستى گه‌لێ كورد هاتیه؛ لێ نها ب ئاواكى رژد و به‌رده‌وام كار ژبۆ چاره‌سه‌ركرنا گرفتاریان تێ كرن و ده‌مه‌كه درێژ ژێره گه‌ره‌كه ژبۆ گوهه‌رتن چێ ببن و نڤیسینا هزر و دیتن و نَرینان كاره‌ك هێسانه؛ لێ گرینگ گوهه‌رتنا هزر و هۆشێ یه ب كریار و دڤێ ئه‌م هه‌موو ژبۆ پێشخستن و پێشده‌برنا جڤاكێ و گاڤێن كو د ئیراقا نوو ده گرینگن بێنه ئاڤێتن؛ ب خه‌بتین. سه‌كره‌ته‌رێ پۆلیت بیرۆیا پارتیێ هه‌روه‌ها به‌هسا تێكلى یێن ناڤبه‌را پارتیا ده‌مۆكراتا كوردستان و پارتى یێن سپانیایێ كر و گۆت سه‌ره‌دانا به‌رپرسیارێ بیرۆیا تێكلى یێن ده‌رڤه یا پارتیێ ژبۆ سپانیایێ سه‌ركه‌تى بوویه و گفتۆگۆیێن ناڤبه‌را هه‌ردو ئالیان ژبۆ خورتكرنا تێكلیان به‌رده‌وامن كو ئه‌ڤ تێكلى سه‌ده‌مێن سه‌ره‌كه یێن پێشده‌برنا دیتن و نَرین و ئاستا چاندى یا ناڤبه‌را هه‌ردو گه‌لێن كورد و سپانیایێ یه. ژبال خوه ڤه ئالبێرتۆ روێز به‌رپرسیارێ تێكلى یێن ده‌رڤه یێ پارتیا گه‌ل یا ده‌ستهلاتددار یا سپانیایێ جیگرێ سه‌كرته‌رێ رێكخستیا سى دى ئاى شابوونا خوه یا ل هه‌مبه‌ر سه‌ره‌دانا هه‌رێما كوردستانێ دیاركر كو ده‌رفه‌ته‌كه ژبۆ ب چاڤێ خوه پێشكه‌تن و ره‌وشا نها یا هه‌رێما كوردستانێ ببینن.
هه‌روه‌ها كورتیه‌ك ل دۆر رێخستیا سى دى ئاى پێشكێشكر كو ژ سه‌د پارتى و هه‌شتێ وه‌لاتان پێكتێ و نها ل بیست و سێ وه‌لاتێن ئه‌وروپى د ده‌ستهلاتێ ده نه؛ هه‌روه‌ها تێكلى یێن ناڤبه‌را هه‌ردو ئالیان ژى ب ئه‌رێنى و سه‌ركه‌تى قه‌بوولكرن و هیڤى خوه‌ست ژبۆ خزمه‌تكرنا هه‌ردو ئالیان هێ ژى ئه‌ڤ تێكلی خورت ببن .
