مه‌کته‌بی سیاسی پیرۆزبایی له حزبی سۆسیالیست دیموکراتی کوردستان ده‌کات
به‌بۆنه‌ی ساڵیادی دامه‌زراندنی حزبی سۆسیالیست دیموکراتی کوردستان، مه‌کته‌بی سیاسیی پارتی دیموکراتی کوردستان په‌یامێکی پیرۆزبایی ئاراسته‌ی سکرتێری حزب و مەکتەبی سیاسیی حزبی سۆسیالیست دیموکراتی کوردستان کردووه که تیایدا هاتووه: ئەمڕۆ لە هەلومەرجێکدا یادی دامەزراندنی حزبەکەتان دەکەنەوە کە پڕکێشییەکانی بەردەم گەلەکەمان زۆرن و گۆڕانکارییەکانی ناوچەکەیش خێران و ئایندەی دۆزی رەوای نەتەوەکەیشمان کەتۆتە ژێر کاریگەری و ئەگەرەکانی ئەو گۆڕانکارییانە، هەموو ئەوانەیش پێویستییان بە یەکڕیزی و کۆدەنگی هەموو هێزە کوردستانییەکان و هەماهەنگی و کاری هاوبەشی لایەنە کوردستانییەکانە.
ئه‌مه ده‌قی په‌یامه‌که‌یه:
برای بەڕێزمان کاکە حەمەی حاجی مەحمود، سکرتێری حزبی سۆسیالیست دیموکراتی کوردستانی تێکۆشەر
بەڕێزان ئەندامانی مەکتەبی سیاسی و سەرکردایەتی و گشت کادیر و ئەندامان و لایەنگرانی حزبی هاوپەیمانمان
بەبۆنەی ساڵوەگەڕی دامەزراندنی حزبە تێکۆشەرەکەتانەوە گەرمترین پیرۆزباییتان ئاراستە دەکەین و ئومێدەوارین ئەم بۆنەیە ببێتەوە هاندەر بۆ هەرچی زیاتر پێشکەوتن و گەشەکردنی حزبی سۆسیالیست دیموکراتی کوردستان، ئەو حزبە خەباتکارەی نیشانەیەکی درەوشاوەی بزووتنەوەی رزگاریخوازی گەلەکەمانە و شوێن دەستی لە مێژووی تێکۆشان و قوربانیدان لەپێناوی ئامانج و مافە رەواکانی گەلی کوردستاندا دیارە و جێی شانازییە.
ئەمڕۆ لە هەلومەرجێکدا یادی دامەزراندنی حزبەکەتان دەکەنەوە کە پڕکێشییەکانی بەردەم گەلەکەمان زۆرن و گۆڕانکارییەکانی ناوچەکەیش خێران و ئایندەی دۆزی رەوای نەتەوەکەیشمان کەتۆتە ژێر کاریگەری و ئەگەرەکانی ئەو گۆڕانکارییانە، هەموو ئەوانەیش پێویستییان بە یەکڕیزی و کۆدەنگی هەموو هێزە کوردستانییەکان و هەماهەنگی و کاری هاوبەشی لایەنە کوردستانییەکانە. بڕوامان بەوەیە حزبی سۆسیالیست دەتوانێ لەگەڵ ئێمەو هاوپەیمانەکانمان رۆڵی گرنگ بگێڕێ بۆ رێکخستنی ناوماڵی کوردستان و یەکبوونی ئیرادەی سیاسیمان بۆ بەرگریکردن لە دەستکەوتەکانمان و هەنگاونان بۆ بەدیهێنانی ئامانجەکانی گەلەکەمان.
سەری رێز و نەوازش بۆ شەهیدانی حزبە تێکۆشەرەکەتان و هەموو شەهیدانی بزاڤی رزگاریخوازی کوردستان دادەنەوێنین .
جارێکی دیکە پیرۆزبایی گەرممان قبوڵ بکەن
مەکتەبی سیاسی
پارتی دیموکراتی کوردستان
7/8/2012
