به‌رپرسێ رێكخستنا كه‌چه‌ده‌كه‌ لدهوكێ هاته‌ ئازادكرن

دهوك-KDP.info-   به‌رپرسێ رێكخستنا پارتا چاره‌سه‌ریا دیموكراتیا كوردستانی، كه‌چه‌ده‌كه،‌ لدهوكێ یێ بناڤێ (عبداللە اسماعیل عبداللە) ناسیار ب (احمد رێکانی) پشتی 8 روژان ژلایێ ئاسایشا دهوكێ ڤه‌ برەنگەکێ یاسایی و لدیف بریارا دادوەرێ ڤەکولینا ئاسایشا دھوک، ل سەر بابەتەکێ ئەمنی کو گرێدای ب ئاسایشا ھەرێما کوردستانێ ڤە هاتیه‌ ده‌سته‌سه‌ركرن، ئه‌ڤرو هاته‌ ئازادكرن.

دكونفرانسه‌كی روژنامه‌ڤانی دا (عبداللە اسماعیل عبداللە) ناسیار ب (احمد رێکانی) بوkdp.info  دیاركر، ده‌سته‌سه‌ركرنا من ژلایێ ئاسایشا دهوكێ ڤه‌ ژبه‌ر كوری من بوو كو پێشی دوو سالان گه‌هشتیه‌ دناڤا رێزین په‌كه‌كی و وبه‌ری چەند روژان ل روژئاڤایێ كوردستانی هاتیه‌ برینداركرن و بو چاره‌سه‌ریێ هاتبوو هه‌ریما كوردستانی و جاردن ڤه‌گه‌ریا یه‌ روژئاڤایێ كوردستانێ، ئاسایشێ دڤیا پێزانینا لسه‌ر كوری من وه‌ربگرن كا نوكه‌ ل كیری یه‌.

ناڤبری دیاركر ژی، كو ئه‌ڤه 8 روژه‌ ئه‌ز یێ ده‌سته‌سه‌ركری و چ كارێن نه‌ جوان ژلایێ ئاسایشا دهوكێ ڤە دگه‌ل من نه‌ هاتینه‌ كرن و ئه‌ڤرو ژی ئه‌ز هاتمه‌ ئازادكرن.

  پیشی نوكه‌ ژی رێڤەبەریا ئاسایشا پارێزگەھا دھوکێ رونکرنه‌ك بەلاڤ كر بو، كو ناڤبری ل میژوویا (6/5/2014) ژلایێ مەڤە ھاتیە گرتن ب رەنگەکێ یاسایی و لدیف بریارا رێزدار دادوەرێ ڤەکولینا ئاسایشا دھوک ل سەر بابەتەکێ ئەمنی کو گرێدای ب ئاسایشا ھەرێما کوردستانێ ڤە ھەیە ، ونوکە ل گرتیخانا زرکا یێ راگرتیە و ھەر کەسەک ژ خێزان و کەس کارێن وی و پارێزەرێ وی د شێن سەرەدانا وی بکەن ، و ڤەکولین د بابەتێ ناڤبری دا یا بەردەوامە و ھەر بریارەکا ژلایێ دادگەھێ ڤە دەربچیت ئەم دێ جێ بەجێ کەین ومل کەچ بین.

مە دڤێت بو ھەمو لایەنەکی دیاربکەین کو ئەم وەکو (ئاسایش) چ جارا کەسەکێ ناگرین ب رەنگەکێ نە یاسایی و ل سەر بابەتێن بیر ورایێن جودا و جیاواز چونکە ئەڤە نە ئەرکێ مەیە بەلکو ئەرکێ مە یێ سەرەکی ئەوە ئەم پاراستنا ئەمن وئاسایشا خەلکێ خو و ھەرێما کوردستانێ بکەین و ھەر کەسەک یان لایەنەک ببیتە جھێ مەترسیێ ل سەر ئاسایشا ھەرێمێ دێ ب رێکێن یاسایی پێرابونا ژێ وەرگرین.

 

دلدار ئیبراهیم