دەرگەهێ خالا سەرزێری یا دناڤبەرا هەریمێ وتوركیا دا ب فەرمی هاتە ڤەكرن

دهوك-KDP.info/د رێ و ره‌سمه‌كێ‌ دا ب به‌رهه‌ڤبونا پارێزگه‌رێ‌ دهۆكێ‌ (ته‌مه‌ر ره‌مه‌زان) و پارێزگه‌رێ‌ هه‌كاری ل وه‌لاتێ‌ توركیا و ب به‌شداریا قائیمقامێ‌ قه‌زا ئامێدیێ‌ و گه‌له‌ك ژ كه‌سایه‌تی و پله‌دارێن حكوومی و سه‌ربازی و خه‌لكه‌كێ‌ زۆر ژ ده‌ڤه‌را به‌رواری بالا و پارێزگه‌ها هه‌كاریا، ده‌رگه‌هێ‌ خالا گومركا سه‌رزێری ب شێوه‌یه‌كێ‌ فه‌رمی هاته‌ ڤه‌كرن.

پارێزگه‌رێ‌ دهۆكێ‌ (ته‌مه‌ر ره‌مه‌زان) د په‌یڤه‌كی دا ل وان رێ‌ و ره‌سمان گرنگیا ڤه‌كرنا ڤی ده‌رگه‌هی دیاركر و گۆت: ڤه‌كرنا خالا سه‌رزێری پێنگاڤه‌كا زۆرا گرنگ بوو، بۆ خه‌لكێ‌ ڤێ‌ ده‌ڤه‌رێ‌ و هه‌روه‌سا ب شێوه‌یه‌كێ‌ گشتی بۆ ده‌ڤه‌را دهۆكێ‌، ژ به‌ر كو ئه‌ڤ ده‌رگه‌هه‌ دێ‌ بیته‌ خالا ڤه‌ژاندنا ئابووری ل پارێزگه‌ها دهۆكێ‌ و په‌یوه‌ندیێن بازرگانی ل ناڤبه‌را هه‌رێما كوردستانێ‌ و وه‌لاتێ‌ توركیا دێ‌ خورت بن و خه‌لك دێ‌ مفایه‌كێ‌ باش ژێ‌ بینن و دێ‌ بیته‌ ئه‌گه‌رێ‌ ئاڤاكرنا ڤێ‌ ده‌ڤه‌رێ‌ و خه‌لك دێ‌ قه‌ستا گوندێن خوه‌ كه‌ن.
پارێزگه‌رێ‌ دهۆكێ‌ دیاركر، دیسان وه‌لاتیێن هه‌ردوو لا دێ‌ شێن ب ساناهی هاتن و چوونێ‌ كه‌ن، ئه‌ڤ چه‌نده‌ ب وه‌رچه‌رخانه‌كا دیرووكی دا دیاركرن و گۆت مه‌ په‌یوه‌ندیێن خورت دگه‌ل توركیا هه‌نه‌ و ڤه‌كرنا ڤی ده‌رگه‌هی باشترین گروڤه‌ یه‌ بۆ ڤێ‌ چه‌ندێ‌ و ل ده‌ستپێكێ‌ ئه‌ڤ ده‌رگه‌هه‌ بارا پتر دێ‌ بۆ هاتن و چوونا وه‌لاتیان و گه‌شت و گوزارێ‌ هێته‌ بكار ئینان.

دڵدار ئیبراهیم