عیسمەت یڵماز: قۆناغی چارەسەریی پرسی كورد زۆر بە باشی بەڕێوە دەچێت
سیواس- KDP.info/ وەزیری بەرگریی توركیا، عیسمەت یڵماز رایگەیاند كە قۆناغی چارەسەریی پرسی كورد زۆر بە باشی بەڕێوە دەچێ و "ئەو قۆناغەی ئێستای جێگای رەزامەندیی ئێمەیە."
ماڵپەڕی رۆتاخەبەر بڵاوی كردەوە كە وەزیری بەرگریی توركیا، عیسمەت یڵماز لە میانی سەردانێك بۆ پارێزگای سیواس لەگەڵ ژمارەیەك خەڵكی ئەو ناوچەیەدا كۆ بووەتەوە و باسی قۆناغی چارەسەریی پرسی كورد و پرۆسەی دیموكراتیزەكردنی توركیای كردووە.
عیسمەت یڵماز ئاماژەی بەوە كردووە كە قۆناغی چارەسەریی پرسی كورد پرۆژە و داوای خەڵك و پێكهاتەكانی توركیا بووە و لە سەر گوشاری هیچ كەس و لایەنێك دەست بەو قۆناغە نەكراوە.
یڵماز جەختی كردووەتەوە كە قۆناغی چارەسەری زۆر بە باشی بەڕێوە دەچێت و پێشەوەچوونی ئەو قۆناغەیش جێگای رەزامەندیی حكوومەت و خەڵكی توركیایە.
ئەردەلان گۆران
