سه‌رۆك بارزانی: لەسێدارەدانی قازی محەممەد و هاوڕێیانی هەستی كوردایەتی و ئازادیخوازی لە ناخی تاكی كورددا بەهێزتر كرد
هەولێر- KDP.info/ سه‌رۆكی هه‌رێمی كوردستان، مەسعوود بارزانی، رایگه‌یاند كه له‌سێداره‌دانی پێشه‌وا قازی محه‌ممه‌د و هاوڕێیانی هه‌ستی كوردایه‌تی و ئازادیخوازی له ناخی تاكی كورددا به‌هێزتر كرد، په‌یامی ئاشتی و ره‌وایه‌تیی دۆزی گه‌له‌كه‌مانیشی دووپات كرده‌وه.
سه‌رۆكی هه‌رێمی كوردستان، مه‌سعوود بارزانی، له په‌یجی تایبه‌تیی خۆی له تۆڕی كۆمه‌ڵایه‌تی فه‌یسبووك په‌یامێكی به‌بۆنه‌ی ساڵیادی له‌سێداره‌دانی پێشه‌وا قازی محه‌ممه‌د و هاوڕێیانی بڵاو كرده‌وه ئەمە دەقەكەیەتی:
لە ساڵیادی لەسێدارەدانی پێشەوا قازی محەممەد سڵاو بۆ گیانی پاكی قازی و گشت شەهیدانی ڕێگەی ئازادی دەنێرین. مەرگ و فیداكاریی پێشەوا قازی لە پێناو بەردەوامیی خەباتی گەلی كورد بوو. لەسێدارەدانی قازی و هاوڕێیانی هەستی كوردایەتی و ئازادیخوازی لە ناخی تاكی كورددا بەهێزتر كرد. لەم یادەدا پەیامی ئاشتی و ڕەوایەتیی دۆزی گەلەكەمان دووپات دەكەینەوە و گەلی كورد بە هیوایەكی زۆر مەزنتر سەیری داهاتوو دەكات.
مه‌سعود بارزانی
