هاوپەیمانیی كوردستانی، بەشداری لەکۆبوونەوەی سبەینێی پەرلەمان لەبارەی بودجەوە ناکات

 

بەغدا- KDP.info/ پەرلەمانتارێکی کورد دەڵێت، بڕیارە سبەی پەرلەمانی عێراق کۆ ببێتەوە و تێیدا گفتوگۆ لەبارەی بودجەوە بکات، بەڵام ئەوان بەشداری تێدا ناکەن، لەبەر ئەوەی تاوەکو ئێستا داواکارییەکانیان جێبەجێ نەکراون.

ئەندامی پەرلەمانی عێراق لەسەر لیستی ھاوپەیمانیی کوردستانی، شلێر عەزیز، بە kdp.infoـی راگەیاند: سبەی پەرلەمانی عێراق کۆ دەبێتەوە و کارنامەی کۆبوونەوەیش لە شەش خاڵ پێک دێت، کە یەکێک لە خاڵەکان خوێندنەوەی دووەمە بۆ پڕۆژەیاسای بودجە.

شلێر عەزیز گوتیشی: ئێمە بەشداری لە کۆبوونەوەی سبەی دەکەین، بەڵام ھەر کاتێک خوێندنەوەی دووەم بۆ پڕۆژەیاسای بودجە بکرێت، ئێمە بەشداری ناکەین، لەبەر ئەوەی تاوەکو ئێستا ھەرێم و بەغدا لەبارەی کێشەکانی نێوانیان نەگیشتوونەتە ھیچ رێکكەوتنێک.

جەختیشی کردەوە، كە هاوپەیمانیی كوردستانی بەشداری لە ھیچ گفتوگۆیەک ناکات باس لە بودجە بکات، تاوەکو داواکارییەکانی هەرێمی كوردستان جێبەجێ نەکرێت.

بڵند ئیبراھیم