ل ناحیا بامه‌رنێ گه‌نجه‌كێ 19 سالی بابێ خوه ب بلۆكان دكوژیت
دهوك- KDP.info/ به‌رپرسێ راگه‌هاندنا پۆلیسێن پارێزگه‌ها دهۆكێ دیار كر كو شه‌ڤا بوری ل ناحیا بامه‌رنێ سه‌ر ب قه‌زا ئامێدیێ ڤه گه‌نجه‌كێ 19 سالی بابێ خوه ب بلۆكان دكوژیت و تاوانبار هاتیه ده‌سته‌سه‌ركرن و دان ب تاوانا خوه كریه.
نه‌قیب بریندار حه‌مید شه‌ریف، به‌رپرسێ راگه‌هاندنا پۆلیسێن پارێزگه‌ها دهۆكێ بوkdp.info ئاشكرا ژی كر،ل شه‌ڤا بوری ئه‌و هاتنه ئاگه‌هدار كرن كو روودانه‌ك ل ناحیا بامه‌رنێ یا سه‌ر ب قه‌زا ئامێدیێ ڤه روودایه، پشتی پۆلیس و ئه‌فسه‌رێ نوبه‌دار گه‌هشتینه جهێ روودانێ و دیار بوو كو گه‌نجه‌كێ 19 سالی بابێ خوه یێ 45 سالی ب بلۆكان كوشتیه.
و ئه‌گه‌رێ روودانێ ئه‌و بوو كو بابێ وی ب سه‌رخۆشی هاتیه مال و نه‌خۆشی گه‌هانیه مال و چه‌ند جاران ئه‌ڤ چه‌نده دوباره كریه و كوڕێ وی دچیته سه‌ر بانی و بلۆكه‌كی ل سه‌ری و ئێكی ژی ل سینگێ وی دده‌ت و ده‌ملده‌ست گیانێ خوه ژ ده‌ست دده‌ت.
به‌رپرسێ راگه‌هاندنا پۆلیسێن پارێزگه‌ها دهۆكێ خویا كر كو ته‌رمێ وی بۆ نوشداریا داد ل پارێزگه‌ها دهۆكێ هاته ڤه‌گوهاستن بۆ پتر زانینا ئه‌گه‌رێن روودانێ .
