جه‌واد به‌زونی: هه‌موو داواكارییه‌كانی هه‌رێمی كوردستان ده‌ستو‌وریین
په‌رله‌مانتارێكی سه‌ربه‌خۆی هاوپه‌یمانیی نیشتمانی، جه‌ختده‌كاته‌وه هه‌موو داواكارییه‌كانی هه‌رێمی كوردستان له حكومه‌تی فیدراڵی ده‌ستوریین و هه‌موو قه‌واره سیاسییه‌كان كۆكن له‌سه‌ری.
جه‌واد به‌زونی، په‌رله‌مانتارێكی سه‌ربه‌خۆی هاوپه‌یمانیی نیشتمانی، له لێدوانێكدا بە خەندانی راگەیاندووە::" داواكارییه‌كانی هه‌رێم ده‌ستو‌ورین و هه‌موو لایه‌ك له‌سه‌ر ئه‌وه ته‌باو كۆكن".
به‌زونی ئه‌وه‌شی خسته‌ڕوو، كه دیارترین كێشه له چوارچێوه‌ی ناكۆكیه‌كانی نێوان حكومه‌تی ناوه‌ندی و حكومه‌تی هه‌رێمی كوردستاندا بریتییه له هه‌نارده‌كردنی نه‌وت و غاز‌و هه‌ردو‌ولا ڕای جیاوازیان هه‌یه له‌وباره‌یه‌وه‌‌و ئه‌وه‌ش له‌ڕێگای دیالۆگه‌وه چاره‌سه‌رده‌كرێت. مه‌سه‌له جێناكۆكه‌كانی تری وه‌كو ماده‌ی 140 و ئه‌وانی تر له‌ڕێگای ده‌ستوور و ئه‌نجومه‌نی نوێنه‌رانی عیراقه‌وه چاره‌سه‌رده‌كرێن.
وتیشی: "جێبه‌جێكردنی داواكارییه‌كانی هه‌رێم ئاسانتره له جێبه‌جێكردنی داواكارییه‌كانی لیستی عیراقیه، هه‌رچه‌نده كێشه‌كان له‌گه‌ڵ كوردا گه‌وره‌ترن له‌چاو كێشه‌كان له‌گه‌ڵ لیستی عیراقیه‌دا، كه خۆیان له ناونانی پاڵێوراوه‌كانی وه‌زاره‌ته ئه‌منییه‌كان و هاوسه‌نگی له دامه‌زراوه‌كانی ده‌وڵه‌ت و په‌سه‌ندكردنی یاسای ئه‌نجومه‌نی سیاسه‌ته ستراتیژییه‌كاندا ده‌بیننه‌وه".
