ئێكه‌تیا ئه‌وروپی دێ نڤیسینگه‌ها خو یا په‌یوه‌ندیان ل هه‌ڤلێرێ ڤه‌كه‌ت
دهوك- KDP.info/ كومیسارا ئێكه‌تیا ئه‌وروپی بو هاریكارێن نیڤ ده‌وله‌تی و مروڤایه‌تی ڕاگەهاند، "ئەم هاتینه كوردستانێ داكو دگه‌ل حكومه‌تا هه‌رێما كوردستانێ دوو بابه‌تا گه‌نگه‌شه بكه‌ین ئێك چاوا ئه‌م دێ شیێن هاریكاریان فرێكه‌ینه ناف ئاخا سوریێ بو خه‌لكێ مایه ل سوریێ." هه‌روه‌سا گوت، "داباشتر بشێن هاریكاریا حكومه‌تا هه‌رێما كردستانێ بكه‌ین لدور ڤی بابه‌تی مه لبه‌ره ل نێزیك نڤیسینگه‌ها ئێكه‌تیا ئه‌وروپی ل هه‌ڤلێرێ ڤه‌كه‌ین."
پارێزگه‌رێ دهوكێ (ته‌مه‌ر ره‌مه‌زان) پێشوازیا خاتون (كریستالینا جورجییڤا) كومیسارا ئێكه‌تیا ئه‌وروپی بو هاریكارێن نیڤ ده‌وله‌تی و مروڤایه‌تی و شاندێ دگه‌لدا كر.
دهه‌ڤدیتنه‌كێ دا پارێزگه‌رێ دهوكێ خوشحالیاخو بڤێ سه‌ره‌دانێ ده‌ربری و دیار كر كو خه‌لكێ دهوكێ هه‌روه‌سا خه‌لكێ ئاواره گه‌له‌ك كه‌یف خوشن ب ڤێ سه‌ره‌دانێ و گوت ئه‌ف سه‌ره‌دانه نیشانا گرنگی دانا ئێكه‌تیا ئه‌وروپی یه ب سه‌روبه‌رێ ئاوارێن سوریێ. هه‌روه‌سا پارێزگه‌رێ دهوكێ دیاركر كو نه‌بتنێ ئاوارێن سوری ل پارێزگه‌ها دهوكێ هه‌نه به‌لكو ئاوارێن توركیا و ناڤه‌راست و ژێریا ئێراقێ وئیرانێ ژی ل سنورێ پارێزگه‌هێ ئاكنجینه و ڤان ده‌ربه‌ده‌رو ئاوارا بارێ پارێزگه‌هێ گه‌له‌ك گران كریه.
ژلایێ خوڤه (كریستالینا جورجییڤا) كومیسارا ئێكه‌تیا ئه‌وروپی سوپاسیا پارێزگه‌ها دهوكێ كر بو وان خزمه‌ت و هاریكاریێن به‌رده‌وام بو په‌نابه‌رێن سوریێ پپَشكێش دكه‌ن و دیار كر كو سه‌روبه‌رێ په‌نابه‌ران ل سنورێ پارێزگه‌ها دهوكێ ب تایبه‌تی وهه‌رێما كوردستانێ بگشتی گه‌له‌ك باشه ژئه‌نجامێ پوته‌دان و هاریكاریا حكومه‌تا هه‌رێمی ب سه‌روبه‌رێ وان .
كومیسارا ئێكه‌تیا ئه‌وروپی دیاركر كو ئێكه‌تیا ئه‌وروپی كوژمێ 3 ملیارو 500 ملیون دولارا ته‌رخانكریه بو هاریكاری كرنا خه‌لكێ سوریێ هنده‌ك ژ ڤان هاریكاریا بو ناف سوریێ و هنده‌كێن دی بو ئاوارێن ل وه‌لاتێن ده‌وروبه‌رێن سوریێ ئاكنجی دێ هێته پێشكێشكرن و ته‌ئكید ل سه‌ر دیتنا چاره‌سه‌ریه‌كا سیاسی بو وه‌لاتێ سوریێ كر و گوت دیتنا چاره‌سه‌ریا سیاسی دێ هه‌می ئاریشێن ڤی وه‌لاتی چاره‌كه‌ت.
دداخویانیه‌كێ بو كه‌نالێن راگه‌هاندنێ كومیسارا ئێكه‌تیا ئه‌وروپی گوت ئه‌ز یا هاتیمه كوردستانێ و پارێزگه‌ها دهوكێ دا سوپاسیێن خو ئاراسته‌ی حكومه‌تا هه‌رێما كوردستانێ و پارێزگه‌هێ دهوكێ و خه‌لكێ پارێزگه‌هێ بكه‌ین بو پێشكێشكرنا وان هاریكاریێن بو په‌نابه‌رێن سوریێ هه‌تا نوكه كرین وه‌كی ئه‌م دزانین كو خه‌لكێ سوریێ دسه‌روبه‌ره‌كێ كه‌له‌ك ته‌نگاڤ دا.
هه‌روه‌سا گوت: ئێكه‌تیا ئه‌وروپی ئێك ژ مه‌زنترین ده‌وله‌تایه یێن هاریكاری بو خه‌لكێ سوریێ كومكرین و تا نوكه 3 ملیار و 500 ملیون دولار هاتینه كومركرن و بو په‌نابه‌ران وخه‌لكێ سوریێ ل ناف سوریێ و ده‌رڤه‌ی سوریێ هاتینه پێشكێشكرن. ئەم هاتینه كوردستانێ داكو دگه‌ل حكومه‌تا هه‌رێما كوردستانێ دوو بابه‌تا گه‌نگه‌شه بكه‌ین ئێك چاوا ئه‌م دێ شیێن ڤان هاریكاریا فرێكه‌ینه ناف ئاخا سوریێ بو خه‌لكێ مایه ل سوریێ و ده‌رنه‌كه‌فتی و داكو نه‌چار نه‌بن ژ وه‌لاتێ خو ده‌ركه‌ڤن،و بو ڤێ ده‌ڤه‌رێ هه‌روسا دیتنا باشترین رێك بو خه‌رجكرنا ڤان پارا ل ناڤ هه‌رێما كوردستانێ هه‌روه‌سا چ بو سوریا یا وان په‌نابه‌رێن ژلایێ دی یێن ئێراقێ قه‌ستا هه‌رێما كوردستنانێ كرین.
و مه 23 ملیون دولار بو په‌نابه‌رێن سوریێ ل ڤێ ده‌ڤه‌رێ ته‌رخانكرین.هه‌روه‌سا گوت: داباشتر بشێن هاریكاریا حكومه‌تا هه‌رێما كردستانێ بكه‌ین لدور ڤی بابه‌تی مه لبه‌ره ل نێزیك نڤیسینگه‌ها ئێكه‌تیا ئه‌وروپی ل هه‌ڤلێرێ ڤه‌كه‌ین.
هه‌روه‌سا پارێزگه‌رێ دهوكێ دداخویانیه‌كێ دیار كر كو وه‌كو حكومه‌ت یا به‌رده‌وامه ل سه‌ر هاریكاریكرنا په‌نابه‌ران و ئه‌و په‌نابه‌رێن نوكه ل ناف كه‌مپی چ جارا بێ ئیمكانات نه‌ماینه و ئه‌و تشتێن پێدڤی ل دوف پیڤه‌رێنUN ل سه‌ر كار دكه‌تن بو دهێنه دابینكرن كو باشترین پیڤه‌ر هه‌رێما كوردستانێ یه به‌رامبه‌ر وه‌لاتێن ده‌وروبه‌رێن كوردستانێ،هه‌رده‌م ئه‌و شیان لبه‌ر ده‌ستن قه‌یرانا ئابوری ل هه‌رێمێ هه‌بیت یانه‌بیت و پاره یێ ل به‌نكا بو مه‌ره‌ما هاریكاری كرنا په‌نابه‌ران و لیژنێن تایبه‌تمه‌ند یێن هه‌ین ڤان پارا خه‌رج دكه‌ن و دێ به‌رده‌وام ژی بیت.
ل دور به‌رهه‌ڤیا پارێزگه‌هێ بو پێشوازی كرنا پتر په‌نابه‌ران پارێزگه‌رێ دهوكێ گوت: داخازا مه ئه‌وه حكومه‌تا هه‌رێما كوردستانێ و وه‌زاره‌تا نافخو و سه‌روكێ حكومه‌تێ رێك بهێنه دیتن كو په‌نابه‌ر زێده‌نه‌بن و نوكه دگه‌ل ڤێ كومیسارا ئه‌وروپی ژی ئه‌و داخاز مه‌كریه كو رێك بهێنه دیتن كو هاریكاری بو خه‌لكێ سوریێ ل ناف سوریێ بخو بهێته كرن.
دڵدار ئیبراهیم
