ھەفتەی داھاتوو سەرۆکی ھەرێم لەگەڵ نوێنەرانی کورد لەبەغدا کۆدەبێتەوە

بەغدا- تایبەت بەKDP.info/سەرۆکی فراکسیۆنی یەکگرتووی ئیسلامی لە پەرلەمانی عێراق گوتی، بۆ تاوتووکردنی کێشەکانی نێوان ھەرێم و بەغدا، بڕیارە شەممەی داھاتوو سەرۆکی ھەرێمی کوردستان لەگەڵ نوێنەرانی کورد لە بەغدا کۆ ببێتەوە.

سەرۆکی فراکسیۆنی یەکگرتووی ئیسلامی لە پەرلەمانی عێراق، نەجیب بالەتەیی، بە kdp.infoراگەیاند: ئەمڕۆ پەیوەندی بە ئێمە کرا کە رۆژی شەممەی داھاتوو سەعات 11ـی پێشنیوڕۆ سەرۆکی ھەرێمی کوردستان بۆ تاوتووکردنی کێشەکانی نێوان ھەرێم و بەغدا لەگەڵ نوێنەرانی کورد کۆ دەبێتەوە، چونکە بڕیارە رۆژی یەکشەممەی داھاتوو پەرلەمانی عێراق خوێندنەوەی یەکەم بۆ پڕۆژەیاسای بودجە بکات و ئێمە چ ھەڵوێستێکمان ھەبێت.

 سەرۆکی فراکسیۆنی یەکگرتووی ئیسلامی لە پەرلەمانی عێراق گوتیشی: لە کۆبوونەوەکە باس لە دواھەوڵەکانی شاندی حکوومەتی ھەرێمی کوردستان دەکرێت لەگەڵ بەغدا بۆ گەیشتن بە چارەسەرێک لەبارەی کێشەکانی نێوانیان، چونکە وەک دیارە تاوەکو ئێستا نەگەیشتوونەتە ھیچ رێکكەوتنێک.

نەجیب بالەتەیی راشیگەیاند: کاتێکی کەم ماوە بۆ ھەڵبژاردنی پەرلەمانی عێراق، بۆیە رەنگە لە کۆبوونەوەی داھاتوو ھەڵوێستی خۆمان دیاری بکەین ئایە بەشداری لە کۆبوونەوەکانی پەرلەمان بکەین یاخود بەردەوام بین لە بایکۆتکردن.

بڵند ئیبراهیم