داخاز دهێته كرن فه‌رمانگه‌هه‌كا گوزاری ل دێره‌لۆك بهێته ڤه‌كرن
ئامیدیی- KDP.info/ژبه‌ر هه‌بوونا هه‌ژماره‌كا زۆرا جهێن گوزاری ل ده‌ڤه‌رێ ده‌رچوویێن په‌یمانگه‌ها گوزاری و ئوتێلگه‌ری داخاز دكه‌ن كو فه‌رمانگه‌هه‌كا ئوتێلگه‌ری ل سنورێ ناحیا دێره‌لۆك سه ر ب قه زا ئامیدیێ ڤه بهێته ڤه‌كرن بۆ وێ یه‌كێ بشێن كه‌رتێ گوزاری ل ده‌ڤه‌رێ به‌رڤ پێش ببه‌ن و ل دووڤ ئاخفتنا وانا نها چ گرنگی ب جهێن گه‌شتیاری یێن ده‌ڤه‌رێ ناهێته دان.
ئێك ژ ده‌رچوویێن په‌یمانگه‌ها گوزاری و ئوتێلگه‌ری ل دهوكێ محه‌مه‌د حه‌سه‌ن دیاركر، كو هه‌ژماره‌كا زۆرا جهێن گوزاری ل سنورێ ناحیا دێره‌لۆكێ هه‌نه لێ وه‌ك پێدڤی گرنگی پێ ناهێته وژ به‌ر وێ یه‌كێ ژی ڤه‌كرنا فه‌رماگه‌هه‌كی دڤێ بواری دا ل ده‌ڤه‌رێ دێ بیته ئه‌گه‌رێ پێشخستنا كه‌رتێ گه‌شتیاری ل ده‌ڤه‌رێ ئه‌ڤه زێده‌باری هه‌ژماره‌كا زۆرا ده‌رچویێن گوزاری ل سنورێ ناحیا دێره‌لۆك هه‌نه یێن بێ كارن ئه‌ڤه ئه‌و ژی دێ ب كار كه‌ڤن و دێ شێن ب ڤێ رێكێ خزمه‌تا وه‌لاتێ خوه كه‌ن.
ناڤبری چارسه‌ری ژی ڤه‌گه‌ران بۆ ڤه‌كرنا فه‌رمانگه‌هه‌كا گوزاری و گۆت: (ئه‌گه‌ر فه‌رمانگه‌هه‌كا گوزاری ل ده‌ڤه‌رێ بهێته ڤه‌كرن ئه‌ڤه دێ شێت خزمه‌ته‌كا باش ژلایێ گه‌شتیاری ڤه پێشكێش كه‌ت هه‌ر چ نه‌بیت دێ شێت وان جهێن گوزاری ده‌ست نیشان كه‌ت و دێ شێت رێبه‌ره‌كی چێكه‌ت بۆ هندێ گه‌شتیار قه‌ستا ڤان جهان بكه‌ن یان ژی دێ شێت ئاماره‌كی دروست كه‌ت كو سالانه چه‌ند گه‌شتیار قه‌ستا ده‌ڤه‌را مه دكه‌ن یان ژی رێژا گه‌شتیارا به‌رڤ زێده‌بوونێ یان كێم بوونێ دچیت و ئه‌گه‌ری و ئه‌نجامان ب دروستی بۆ لایه‌نێن په‌یوه‌ندیدار دیاركه‌ین.
ژلایێ خوه ڤه به‌همه‌ن ئه‌حمه‌د رێڤه‌به‌رێ ناحیا دێره‌لۆك بۆ kdp.infoدیاركر، كو راسته ده‌ڤه‌را دێره‌لۆكێ ده‌ڤه‌ره‌كا گه‌شتیاری یه و هه‌ژماره‌كا زۆرا جهێن گه‌شتیاری ل ده‌ڤه‌را مه ژی هه‌نه لێ تا نها ب فه‌رمی چ داخازیێن ب ڤی ره‌نگی كو داخازكربیت فه‌رمانگه‌هه‌كا گوزاری ل ده‌ڤه‌رێ بهێته ڤه‌كرن ژلایێ ڤان قوتابیان ڤه نه‌گه‌هشتینه مه و گۆت: راسته ڤه‌كرنا هه‌ر فه‌رمانگه‌هه‌كێ ل ده‌ڤه‌رێ دێ شێت پتر خزمه‌تا ده‌ڤه‌رێ كه‌ت ئه‌ڤجار ژهه‌ر لایه‌كی ڤه بیت و ڤه‌كرنا فه‌رمانگه‌ها گوزاری ژی ل ناحیا دێره‌لۆكێ ئێك ژ كارێن فه‌رن و ئه‌م ژی دێ ژلایێ خوه‌ڤه داخازیان ڤان ده‌رچووێن په‌یماگه‌نگه‌ها گوزاری كو ل ده‌ڤه‌رێ ئاكنجی نه بۆ لایه‌نێن په‌یوه‌ندیدار بلند كه‌ین كو ڤه‌كرنا ڤێ فه‌رمانگه‌هێ دێ شێت پتر خزمه‌تا كه‌رتێ گوزاری كه‌ت ل سنورێ ناحیا دێره‌لۆكێ.
دڵدار - دهۆك
