دوو شوڤێر و 450 كیلۆیێن پێدڤیێن پزیشكی هاتنە دەستەسەر كرن

زاخو- KDP.info/دوو شوڤێرێن ترۆمبێلێن بارهەلگر ل كومەلگەها دەروازێ‌ نیڤدەولەتی ئیبراهیم خەلیل نەشیان بگەهنە نیازا خۆ و 450 كیلۆیێن پێدڤیێن پزیشكی ب شێوەیەكێ‌ ڤەشارتی بیننە دناڤ هەرێما كوردستانێ‌ دا.

نه‌جمه‌ددین نێروه‌یی، به‌رپرسێ راگه‌هاندنا كومه‌لگه‌ها ده‌روازێ نیڤده‌وله‌تی ئیبراهیم خه‌لیل بۆ kdp.infoدیار كر،دوو شوڤێرێن ترۆمبێلێن بارهەلگر ب نیازبوون 450 كیلۆیێن پێدڤیێن پزیشكی یێن جوراو جور، ب شێوەیەكێ‌ ڤەشارتی و نە یاسایی ب رێیا دەرگەهێ‌ ئیبراهیم خەلیل بیننە دناڤ هەرێما كوردستانێ‌، لێ‌ خۆشبەختانە ئەو ژ لایێ‌ كارمەندێن هوبا لێگەریانێ‌ و هوبا دیڤچوونا گشتی ڤە هاتنە دەستەسەر كرن و رێك بۆ نەهاتە دان بگەهنە نیازا خۆ.
به‌رپرسێ راگه‌هاندنا كومه‌لگه‌ها ده‌روازێ نیڤده‌وله‌تی ئیبراهیم خه‌لیل:شوڤێرەكێ‌ 150 كیلۆیێن ڤان پێدڤیێن پزیشكی ل بن كورسیێن شوڤێری ڤەشارتبوون و شوڤێرێ‌ دیژی 300 كیلۆ دناڤ بارێ‌ شیرێ‌ زارۆیان دا ڤەشارتبوون، لێ‌ خۆشبەختانە ئەو نەشیان ژ دەستێن كارمەندێن هوبا لێگەریانێ‌ و هوبا دیڤچوونا گشتی قورتال ببن.

نه‌جمه‌ددین نێروه‌یی ئاماژه‌ ب وێ یه‌كێ ژی كر،هەر جورە دەرمانەكێ‌ ب رێكێن یاسایی و ب گورەی رێنمایێن ساخلەمیێ‌ نەبیت، ب هیچ رەنگەكێ‌ ناهێلن بهێنە دناڤ هەرێما كوردستانێ‌ دا، ژ بۆ ڤێ‌ چەندێ‌ ژی چاڤدێریەكا باش ئێخستیە لسەر ئینانا هەر جورە دەرمانەكێ‌ ب رێیا ئیبراهیم خەلیل دگەهیتە دناڤ هەرێما كوردستانێ‌وشۆڤێر ژی دێ‌ ب گورەی رێنمایێن گومركی هێنە سزادان و ئەو پێدڤیێن پزیشكی ژی هەموو دێ‌ هێنە ژناڤبرن.

دڵدار - دهۆك