33 پارت و لایەنی سیاسیی كوردستانی، داوا دەكەن بەرامبەر سیاسەتی تاکڕەوانەی حکوومەتی فیدراڵ هەڵوێست هەبێت
33 پارت و لایەنی سیاسیی كوردستانی لە بەیاننامەیەكی هاوبەشیاندا لە ساڵیادی ئازادکردنی شاری هەولێر لە 11/3/1991ـدا، داوا دەکەن پەلە بکرێت لە پێکهێنانی کابینەی هەشتەمی حکوومەتی هەرێمی کوردستان. هاوكات داوا لە نوێنەرانی کورد لە پەرلەمانی عێراق و حکوومەتی فیدراڵ دەکەن کە هەڵوێستیان بەرامبەر سیاسەتی تاکڕەوانەی حکوومەتی فیدراڵ هەبێت و بە ئەرکی بەرپرسیارەتیی خۆیان هەڵسن.
دەقی بەیاننامەی هاوبەشی بەیاننامەی هاوبەشی 33 پارت و لایەنی سیاسیی كوردستانی لە ساڵیادی ئازادکردنی شاری هەولێر لە 11/3/1991 دا:
جەماوەری خۆشەویستی کوردستان
دانیشتوانی سەربەرزی شاری هەولێر
کەس وکاری شەهیدە نەمرەکان
23 ساڵ بەرلە ئێستا لەدرێژەی هەڵمەتەکانی رۆژانی راپەرین و رزگارکردنی شارو شارۆچکەکانی کوردستان، لە رووداوێکی مێژوویی و گرنگ لە رۆژی 11/3/1991 دا خەڵکی سەربەرزی شاری هەولێر بە کورد و تورکمان و کلدانی و سریانی ئاشوری و هەموو چین و توێژەکانیەوە، شانبەشانی هێزەکانی پێشمەرگەی کوردستان بەرامبەری رژێمی دیکتاتۆری درندەیی بەعسی هاتنە دەنگ و تێکرا هاواریان کرد نا بۆ چەوساندنەوەو توندوو تیژی بەعس، بەڵێ بۆ ئازادی و چەسپاندنی حوکمی گەل . خۆشبەختانە لە ماوەیەکی کورتدا تەواوی دام و دەزگا داپڵۆسێنەرەکانی بەعس کەوتنە دەست خەڵکی ستەم لێکراوی شاری هەولێر.
دوژمنان و داگیرکەرانی کوردستان هیچ رێگایەکی نامرۆڤانەو دوور لە بەهای ئاینی و سیاسی و کۆمەڵایەتی نەما کە بۆ کپ کردنی دەنگ و ئیرادەی خەڵکی کوردستان نەیگرنەبەرو رۆژ بەرۆژ پرۆژەو پیلانی تازەیان دادەرشت، بۆ بەکۆمەڵ کوشتن لە شێوەی راگواستن و ئەنفال و جینۆ ساید کردن، تابە هۆیەوە گەلی کوردستان لە ناو بەرن .
بەڵام یەک ریزی خەڵکی کوردستان و لایەنە سیاسیەکان و گیانی لەخۆ بووردەیی هێزی پێشمەرگەی کوردستان و ئیرادەی لەبن نەهاتووی جەماوەری کوردستان سات لە دوای سات بۆ بەرگریی کردن لە خاک و نیشتیمان بەهێز ترو بەگورتر دەبوو.
جێگەی ئاماژە پێکردنە ئەو سەرکەوتنە مەزنەی خەڵکی راپەریوی شاری هەولێر هاوکات بوو لەگەڵ یادی رێککەوتن نامەی ( 11 )ی ئازاری ساڵی (1970) دانبنێت بە مافی رەوای خەڵکی کوردستان .
ئێمە لێرەدا کە یادی سەرکەوتنەکانی راپەرین و رزگاری کوردستان بە کەرکوکی خۆشەویستیشەوە دەکەینەوە پربە دڵ پیرۆزبایی لە خەڵکی بە ئەمەکی کوردستان بە گشتی و شاری قەڵاو منارە بە تایبەتی دەکەین و سەری رێزو نەوازش بۆ گیانی پاکی شەهیدان دادەنوێنین و سڵاوی خۆراگریش بۆ هێزی پێشمەرگە دەنێرین .
ئەمرۆ لەکاتێکدا یادی ئەو راپەرینە مەزنە دەکەینەوە، ئێمە وەکو کۆمەڵێک حزب و لایەنی سیاسی کوردستان لە پارێزگای هەولێر دەرهەق بەم بارودۆخە تازەیەی کوردستان و ناوچەکە بە پێویستی دەزانین هەڵوێستمان لەم چەند خاڵەی خوارەوە بخەینە روو .
1- پاڵپشت و داواکاری خۆمان دووپات دەکەینەوە بۆ مافە رەواکانی گەلی کورد لە پارچەکانی تری کوردستان بەشێوەیەکی ئاشتییانەو داد پەروەرانە بەبێ دەست وەردان لەکاری سیاسی لایەنەسیاسیەکانی ئەو پارتانە .
2- رەوشی سیاسی هەرێمی کوردستان بە قۆناغێکی هەستیاردا تێدەپەرێت و هەوڵ و هیممەتمان بۆ زیاتر بەرقەرارکردنی بێت تاگەیشتن بە ئاواتی گەلەکەمان و بریاردانی لە چارەنوسی خۆیدا .
3- ناوچە کوردستانیەکانی دەرەوەی هەرێم لە دۆخێکی نالەباردان داواکارین چارەسەری بنەرەتی دۆخی ئەو ناوچانە بکرێت بەپێی مافە دەستوریەکان لە عێراق و جێ بەجێ کردنی مادەی (140) .
4- هەوڵی زیاتر چەسپاندنی ئامانجەکانی راپەرین بدرێت لە پتر فراوانکردنی پانتای دیموکراسی و دابین کردنی ئازادی و نەهێشتنی جیاکاری و پەیرەوکردنی دادپەروەری کۆمەڵایەتی و جەخت کردنەوە لە بەردەوامی پرۆسەی چاکسازی و رووبەروو بونەوەی گەندەلی .
5- داوا دەکەین پەلە بکرێت بۆ پێکهێنانی کابینەی هەشتەمی حکومەتی هەرێمی کوردستان داوا لە لایەنە براوەکان دەکەین چیتر هاوڵاتیان لەدۆخی چاوەروانی نەهێڵنەوە .
6- داوا لە نوێنەرانی کورد لە پەرلەمانی عیراق و حکومەتی فیدراڵ دەکەین کە هەڵوێستیان بەرامبەر سیاسەتی تاکرەوانەی حکومەتی فیدراڵ هەبێت وەبە ئەرکی بەرپرسیارەتی خۆیان هەڵسن .
7- بریار لەسەر پرسە نەتەوەیی و نیشتیمانیەکان بریاری دەستە جەمعی هەموو لایەنە سیاسیەکانی هەرێمی کوردستان بێت .
ناوی حزب و لایەنە بەشدار بووانی ئەم کۆبوونەوە یە ئەمانەی خوارەوەن .
1- یەکگرتووی ئیسلامی کوردستان .مەڵبەندی دوو
2- پارتی سەربەخۆی کوردستان .
3- دەستەی سەرۆکایەتی حزبی رزگاری کوردستان .
4- پارتی کۆماری کوردستان .
5- کۆمەڵەی لیبرالی تورکمان .
6- پارتی دیموکراتی تورکمان .
7- کۆمەڵی ئیسلامی کوردستان .مەڵبەندی (3)
8- حزبی ئایندەی کوردستان .لقی هەولێر
9- حزبی سۆسیالیستی دیموکراتی کوردستان.مەڵبەندی هەولێر
10- یەکێتی نەتەوەیی دیموکراتی کوردستان .هەرێمی هەولێر
11- بزووتنەوەی تورکمانی بێ لایەن .
12- ئەنجوومەنی کلدانی سریانی ئاشوری . لقی هەولێر
13- حزبی بیت النهرین دیموکرات .لقی هەولێر
14- حزبی زەحمەتکێشانی کوردستان . کۆمیتەی سەرکردایەتی هەولێر .
15- بەرەی تورکمانی عیراقی . لقی هەولێر
16- بزووتنەوەی دیموکراتی ئاشوری . لقی هەولێر
17- حزبی رزگاری کوردستان . کۆمیتەی پارێزگای هەولێر
18- بزووتنەوەی گۆران . هەولێر
19- پارتی سەربەخۆی کوردستان .
20- بزووتنەوەی چاکسازی تورکمان . هەولێر
21- بزووتنەوەی دیموکراتی گەلی کوردستان ز ناوەندی هەولێر
22- پارتی یەکگرتووی تورکمان . لقی هەولێر
23- پارتی کرێکاران و رەنجدەرانی کوردستان . ناوەندی هەولێر
24- بزووتنەوەی دیموکراتی تورکمان ز
25- ئۆجاغی برایەتی تورکمان قارداش لق .
26- بزووتنەوەی ئیسلامی لە کوردستان .مەڵبەندی (3)
27- پارتی رزگاری نەتەوەیی تورکمان .
28- گردبوونەوەی نیشتیمانی تورکمان .
29- حزبی شیوعی کوردستان . کۆمیتەی پارێزگای هەولێر
30- یەکێتی نیشتیمانی کوردستان .مەڵبەندی (3)
31- پارتی دیموکراتی کوردستان . لقی دوو .
32- کۆمەڵەی رۆشنبیری تورکمان .
33- ئەنجومەنی نەتەوەیی کلدان .
