سەرۆك بارزانی بۆ هەڵەبجەییەكان: بەپارێزگاكردنی هەڵەبجە كەمترین خزمەتە لە ئاستی قوربانیدانی ئێوەی خۆشەویستدا بێت

هەولێر- KDP.info/ سەرۆكی هەرێمی كوردستان، مەسعوود بارزانی، لە پەیامێكیدا بۆ هەڵەبجەییەكان ڕایدەگەیەنێت، "كاركردن لەسەر مەسەلەی بەپارێزگاكردنی هەڵەبجە بە ئەركی خۆمان دەزانین و، ئێستا ئەم پرسە لای ئەنجوومەنی نوێنەرانی عێراقی فیدڕاڵە." جەختیش دەكاتەوە لەوەی كە بەردەوام دەبن بۆ سەرخستنی ئەم بابەتە گرنگە و بە دەستكەوتی هەموو كوردستانییەكیشی ناو دەبات. هاوكات دەخوازێت كە بواری ئەوە بە كەس نەدرێت یاریی بەم بابەتەوە بكات.

 

دەقی پەیامی پەیامی سەرۆك بارزانی بۆ دانیشتووانی هەڵەبجەی شەهید:

بەناوی خودای گەورە و میهرەبان

خوشك و برایان و دانیشتوانی هەڵەبجەی شەهید

دوای ئەو قوربانیدانە مەزنەی ئێوەی سەربەرز بە كورد و كوردستانتان بەخشیوە بەپارێزگاكردنی هەڵەبجە كەمترین خزمەتە كە لە ئاستی قوربانیدانی ئێوەی خۆشەویستدا بێت. كاركردن لەسەر مەسەلەی بەپارێزگاكردنی هەڵەبجە بە ئەركی خۆمان دەزانین و، ئێستا ئەم پرسە لای ئەنجوومەنی نوێنەرانی عێراقی فیدڕاڵە. دڵنیاتان دەكەین كە بەردەوام دەبین بۆ سەرخستنی ئەم بابەتە گرنگە بە زووترین كات و ئەوەیان دەستكەوتێكە بۆ ئێوەی ئازیز و هەموو كوردستانییەك.

ئومێدەوارم ئێوەی خۆشەویست بواری ئەوە بە كەس نەدەن یاری بەم بابەتەوە بكات و كار بۆ نائومێدكردنی خەڵكی قارەمانی هەڵەبجەی شەهید بكات. چونكە لە ڕاستیدا پڕۆژەی بەپارێزگاكردنی هەڵەبجەی شەهید بابەتێكی نەتەوەیی و نیشتیمانییە و هەنگاوێكە بۆ خزمەتكردنی زیاتری خەڵكی خۆڕاگری ئەم دەڤەرە و ئامانجی ئەوەیە هەڵەبجە ببێتە سەنتەری ئاشتی و ژیانێكی نوێ لە هەرێمی كوردستان و ناوچەكە.

 

مسعود بارزانی

سەرۆكی هەرێمی كوردستان

3ـی 3ـی 2014