زانكۆیا دهۆكێ كار بۆ ئه‌نجامدانا كۆنفرانسه‌كی ل سه‌ر ئه‌نفالان دكه‌ت
دهوك - KDP.info/سه‌نته‌رێ ڤه‌كۆلینێن زانستی و خواندنێن كوردی و رێڤه‌به‌رییا راگه‌هاندنا زانكۆیا دهۆكێ دیدارا دویێ یا زانستی پشتی بۆرینا 27 سالان ل سه‌ر تاوانا ئه‌نفالان سازكر.
سه‌رۆكێ زانكۆیا دهۆكێ د. مصلح دهۆكی گۆت: ئه‌نجامدانا ڤێ دیدارێ ل زانكۆیا دهۆكێ گرنگیا خوه هه‌یه د گه‌له‌ك ئالیاندا ژوانژی كو تاوانا ئه‌نفالان وژدانا مرۆڤاتیێ هه‌ژاند ل هه‌موو جیهانێ و دیسا تا نها چیرۆك و پاشمایێن ئه‌نفالان یێن بووینه ڤه‌كۆلین و راپۆرت و بابه‌تێن ده‌زگه‌هێن میدیایی ل هه‌موو جیهانێ.ناڤهاتی گۆتژی: ئه‌نجامدانا ڤێ دیدارێ ده‌رگه‌هه‌كێ نوو بۆ زانكۆیێ ڤه‌دكه‌ت دگه‌ل داموده‌زگه‌هێن حكومی و نه‌حكومی، وه‌كو یا دیار كو تاوانا ئه‌نفالا ره‌ش برینێن مه‌زن ل پشت خوه هێلاینه تاكو ئه‌ڤ جۆره تاوانان دوباره نه‌بن دڤێت بابه‌تێ ئه‌نفالان ببنه ڤه‌كۆلین و پرتووك بۆ پتر ناساندنا وێ وه‌كو جینۆساید ل سه‌ر ئاستێ نێڤده‌وله‌تی. سه‌رۆكێ زانكۆیێ ئاماژه‌كر كو ئه‌نجامدانا ڤان دیداران ده‌رگه‌هه‌كه ژبۆ هایداركرنا خه‌لكی ل سه‌ر كارو پڕۆژه‌یێن زانكۆیێ ژبۆ پتر نێزیكبوونێ و ئه‌ڤ دیداره ببنه پالپشت بۆ حوكمه‌تا هه‌رێمێ د وارێ ناسكرنا ئه‌نفالان دا.
دیسا نصره‌ت محه‌مه‌د حه‌سه‌ن رێڤه‌به‌رێ گشتیێ شه‌هید و ئه‌نفالكرییان ل دهۆكێ گۆت: مامۆستایێن زانكۆیێ دگه‌ل هندێنه كو ئه‌نفالا ره‌ش بهێته نڤیسین و دیكۆمێنتكرن ژبه‌ر ڤێ چه‌ندێ ئه‌ڤه ماوه‌یێ دو سالانه بڤی كاری رادبن، خویاكرژی، ئه‌نفال وه‌كو پیلانه‌كا نه‌خشه كێشایبوو ژبۆ ژناڤبرنا مله‌تێ كورد.رێڤه‌به‌رێ شه‌هید و ئه‌نفالكریان دیاركرژی، به‌رده‌وام بزاڤ دهێنه‌كرن كو گۆڕێن ب كۆم بهێنه دیتن و ئه‌ڤێن تا نها نه‌هاتینه ئاشكراكرن بزڤرینه هه‌رێما كوردستانێ، ئاماژه‌كرژی، ژبه‌ر ڤێ چه‌ندێ یا فه‌ره بابه‌تێ ئه‌نفالان ببیته سیسته‌م و ل فێرگه‌هـ و زانكۆیان بهێته خواندن.
دیسا به‌رپرسێ سه‌نته‌رێ ئه‌نفالان عه‌لی به‌ندی گۆت: هه‌ر پێنگاڤه‌كا بهێته هاڤێتن مه‌ره‌مه‌ك ژبۆ هه‌یه و ئه‌ڤ چالاكییه هه‌موو دهێنه‌كرن ژبۆ هندێ تاوانا ئه‌نفالان وه‌كو جینۆساید بهێنه ناساندن. خویاكرژی، گرێدانا ڤان دیداران ل سه‌ر پرۆسه‌یا ئه‌نفالان كاره‌كێ زۆر باشه ب تایبه‌تی ل سه‌ر ئاستێ زانكۆیێ كو ئه‌ڤه ماوه‌یێ دو سالانه زانكۆیا دهۆكێ ڤێ چالاكیێ ئه‌نجامدده‌ت.دهێته زانین كو ئه‌نفالا ره‌ش ل شه‌ڤا 22-23/2/1988 ده‌ستپێكربوو و تاكو 6/9/1988 داوی پێ هات و دڤی ماوه‌یێ كورت دا بهزاران وه‌لاتیێن كورد ب شێوه‌یه‌كێ دڕندانه ژ ئالیێ رژێما به‌عس یا ژناڤچووی هاتنه ئه‌نفالكرن.
