عەلاوی: تاوتوێكردنی كارنامە چاكسازییەكەی هاوپەیمانیی نیشتمانی پێویستی بە 70 ساڵە
ئەیاد عەلاوی سەرۆكی لیستی عێراقییە رایگەیاند: كارنامە چاكسازییەكەی هاوپەیمانیی نیشتمانی هەوڵێكە بۆ رزگاركردنی نووری مالیكی سەرۆك وەزیران لە پرۆسەی لێپرسینەوە، ئاماژە بەوەش دەكا كە تاوتوێكردنی بەندەكانی ئەو كارنامەیە پێویستی بە 70 ساڵە.
لە دیمانەیەكدا لەگەڵ رۆژنامەی عەرەب ئەلیەومی ئوردنی عەلاوی رایگەیاندووە: كارنامەی چاكسازیی هاوپەیمانیی نیشتمانی تەنیا بۆ كات بە فیڕۆدانە و هەوڵێكە بۆ رزگاركردنی مالیكی لە پرۆسەی لێپرسینەوە.
هەر لەبارەی كارنامەی چاكسازییەكەوە دەڵێ: تاوتوێكردنی ئەو بەندانەی كە لەو كارنامەیەدا هاتووە پێویستی بە 70 ساڵە.
ئاماژە بەوەش دەكا: تا ئێستە ئەو كارنامەیە نەگەیشتووەتە دەست لیستی عێراقییە.
عەلاوی بە رۆژنامەكەی وتووە: بڕیاری ئێمە بەردەوامیدانە بە پرسی لێپرسینەوە لە سەرۆك وەزیران لە دوای مانگی رەمەزانی پیرۆزدا و بۆ ئەو مەبەستەش ئێستە لە ئامادەكاریین.
