خامنەیی: دانوستانی ئەتۆمی هیچ ئەنجامێكی نابێت
تاران- KDP.info/ رابەری باڵای شۆڕشی كۆماری ئیسلامی ئێران ئایەتوڵڵا عەلی خامنەیی لە بارەی دەستپێكردنی خولی دووەمی دانوستانی وڵاتانی ئەندامی 1+5 و ئێران گوتی: ئەو دانووستانانە ناگەنە ئەنجام و هیچ سوودێكیان نابێت.
لەمبارەیەوە ئاژانسی ئیرنای ئێرانی بڵاویكردەوە كە رۆژی دووشەممە رابەری باڵای شۆڕشی كۆماری ئیسلامی ئێران ئایەتوڵلا عەلی خامنەیی رایگەیاندووە كە دانوستانی نێوان ئێران و وڵاتانی 1+5 لە بارەی بەرنامەی ئەتۆمی ئێرانەوە هیچ سوود و ئەنجامێكی نابێت.
خامنەیی ئاماژەی بەوە كردووە كە ئەمریكا دەیەوێ ئەجەندای خۆی بە سەر خەڵكی ئێراندا بسەپێنێت و خەڵكی ئێرانیش بە هیچ شێوەیەك ئەو ئەجەندایانەی ئەمریكا و رۆژئاوا قەبووڵ ناكات، بۆیە تا ئەو كاتە وڵاتانی رۆژئاوایی بەو جۆرە بیر بكەنەوە و وا بزانن كە دەتوانن خۆیان بە سەر خەڵكی ئێراندا بسەپێنن ئەوا ئەو دانوستانانە ناگەنە ئەنجام.
