ل ئامێدێی ژنەك ب هاریكاریا هەڤالێ خوە زەلامێ خوە دكوژیت
ئامیدیی-KDP.info/ رێڤه‌به‌رێ پولیسێن پارێزگه‌ها دهوكێ راگه‌هاند دماوه‌كێ كورت دا پشتی دیتنا لاشێ گه‌نجه‌كێ 22 سالی شیان تاوانباران ده‌سته‌سه‌ربكه‌ن.
عه‌مید (تارق ئه‌حمه‌د) رێڤه‌به‌رێ پولیسێن پارێزگه‌ها دهوكێ دكونگره‌كێ روژنامه‌ڤانی دا راگه‌هاند، پشتی دوهی ل ده‌مژمێر 10:30 ئه‌م هاتینه ئاگه‌هداركرن كو لاشێ كه‌سه‌كی ل سنورێ ناحیا بامه‌رنێ یه، وپشتی پولیس ل جهێ ناڤبری ئاماده‌بوین و ڤه‌دیتن هاتینه‌كرن، دیاربو كو گه‌نجه‌كێ 22 سالیه و جهێ پێنج كێران ل لاشێ وی یه، وستویێ وی ژی هاتیه‌برین و بو پزیشكا دان هاته ڤه‌گوهاستن.
زێده‌تر عه‌مید تارق ئه‌حمه‌د دبێژیت: دویڤدا ئێكسه‌ر لژنه‌ك بو دویڤچونا بابه‌تی هاته پێكئینان، ب سه‌رپه‌رشتیا رێڤه‌به‌رێ پولیسێن ئامێدیێ موقه‌دم (محه‌مه‌د عه‌بدولره‌زاق) و رێڤه‌به‌رێ نه‌هێلانا گونه‌هباریا دهوكێ موقه‌دم (عسمه‌ت فه‌ره‌ج) و چه‌ند ئه‌فسه‌ر و كارمه‌ندان ڤه و شیان دماوێ چه‌ند ده‌مژمێران دا تاوانباران ده‌ستنیشان بكه‌ن و هاتنه ده‌سته‌سه‌ركرن و دڤه‌كولینێ دا دوو تاوانباران دان ب تاواناخو كر، كو ئێك هه‌ڤالێ وی بوو و یادی ژی هه‌ڤژینا وی بو و ڤان هه‌ردوو تاوانباران دڤه‌كولینێ دا دان ب تاواناخوكر و هاتنه ره‌وانه‌كرن بو دادگه‌هێ ژبو وه‌رگرتنا سزایێ خو.
ل دور ئه‌گه‌رێن ڤێ رویدانێ ژی رێڤه‌به‌رێ پولیسێن پارێزگه‌ها دهوكێ گوت: ئه‌گه‌رێن كوشتنا ڤی گه‌نجی ئه‌و بوو په‌یوه‌ندیا دلداریێ یا نه شه‌رعی دناڤبه‌را هه‌ڤژینا وی و هه‌ڤالێ وی دا هه‌بوو و گه‌هشتبونه رێككه‌فتنێ پشتی ڤێ تاوانێ ب گه‌هنه ئێك كو ببنه هه‌ڤژین.
