لە کێبڕکێیەکی نێودەوڵەتیی نیگارکێشیی دا گەنجانی کورد توانیان خەڵات بەدەستبهێنن

ئێران -  KDP.info/ لە کێبڕکێیەکی  نێودەوڵەتیی نیگارکێشیی دا ژمارەیەک لە گەنجانی کوردی کوردستانی ئێران توانیان خەڵاتی بەدەست بهێنن . 17منداڵ و مێرمنداڵی کورد لە کوردستانی ئێران خەڵاتی دیپلۆمی ئیفتیخاریی ١٥هەمین کێبڕکێی نێودەوڵەتیی نیگارکێشیی (نۆڤا زاگۆرا)ی 2013ی وڵاتی بولگاریایان پێ بەخشرا. ئاژانسەکانی هەواڵی  ئێران بڵاویکردوە : کە ئەو منداڵ و مێرمنداڵە کوردانەی خەڵاتەکەیان پێبەخشرا، تەمەنیان لە نێوان 5هەتا 14ساڵیە و لە شارە جۆراوجۆرەکانی کوردستانی ئێرانەوە وەکو و پیرانشار، سەردەشت، خۆی، کەنگاوەر، مەهاباد، کرماشان، بانە، شنۆ و ئورمیە، بەشدارییان کردووە. لە کێبڕکێی نێودەوڵەتیی نیگارکێشیی (نۆڤا زاگۆرا)  2658  بەرهەم لە 27وڵاتەوە بەشدار بوون کە 17منداڵی کوردی  کوردستانی ئێران  تێدا خەڵات کران.