تا ئێستا 9 هەزار پەنابەری سووریایی گەیشتوونەتە هەرێم
بەڕێوەبەرى كۆچ و كۆچبەران لە دهۆك راى گەیاند، تا ئێستە زیاتر لە 9 هەزار پەنابەری سووریایی گەیشتوونەتە ناو هەرێم و ئاماژەى كرد كە ئامادەكاریی دەكەن بۆ هەر شەپۆڵێكی كۆچكردنى لەناكاو.
محەمەد عەبدوڵا بەئاژانسی كوردستان بۆ دەنگوباس (ئاكانیوز)ى راگەیاند، كاركردن لە كەمپی پەنابەرە سووریاییەكان لە سنووری پارێزگەى دهۆك بەردەوامە و ئێستە قۆناغەكانى یەكەم و دووەم بەكۆتا هاتووە و لە چەند رۆژى داهاتوودا كا لە قۆناغی سێیەم و چوارەم دەكەین.
پتر گوتى، تا ئەمڕۆ زیاتر لە 9 هەزار پەنابەری سووریایی هاتوونەتە ناو خاكی هەرێم و ئەو كەمپە ئێستە لە هەندێك لە شارەكانى هەرێم گەورەترن، لە رووى ژمارەى دانیشتووانەوە چونكە رۆژانە 50 پەنابەری سووریایی رووی تێ دەكەن.
عەبدوڵا گوتى، كەمپەكە ئێستە قۆناغی یەكەم و دووەمى تەواو بووە و لە چەند رۆژى داهاتوودا كار لە قۆناغی سێیەم و چوارەمدا دەكەین چونكە پێشبینی شەپۆڵێكی كۆچی گەورە دەكەین بەرەو ناوچەكانى هەرێم.
بەڕێوەبەری كۆچ و كۆچبەرانى دهۆك ئاماژەى كرد كە بەهاوكاریی لەگەڵ رێكخراوەكانى نەتەوە یەكگرتوەكان تەواوى ئامادەكارییان كردووە بۆ هەر ئەگەرێكی چاوەڕوان نەكراو لە دۆخى سووریادا.
