سه‌رۆكى هه‌رێمى كوردستان له په‌راوێزى كۆڕبه‌ندى جیهانی ئابوورى له‌گه‌ڵ وه‌زیرى ده‌ره‌وه‌ى سوید كۆبۆیەوە
لە دووەم ڕۆژی بەشداریكردنی سەرۆكی ھەرێمی كوردستان له كۆڕبه‌ندی ئابووریی جیهانی له داڤۆس به‌ڕێز مسعود بارزانی سه‌رۆكی هه‌رێمی كوردستان له‌گه‌ڵ كارل بێڵت وه‌زیرى ده‌ره‌وه‌ى سوید كۆبۆیەوه.
له دیدارێكدا، په‌یوه‌ندیی نێوان هه‌رێمی كوردستان و سوید و دوا په‌ره‌سه‌ندنه‌كانی بارودۆخی سیاسی عێراق و بارودۆخی سوریا باسكران.
لەو كۆبونەیەدا وەزیری دەرەوەی سوید وێڕای باسكردنی سەردانی پێشووی بۆ ھەرێمی كوردستان خۆشحاڵیی خۆیشی دەربڕی كە پەیوەندیەكانی نێوان وڵاتی سوید و هەرێمی كوردستان پەرەی سەندووە. وەزیری دەرەوەی سوید ئاماژەیشی بەوەدا كە بەر لە ھاتنی بۆ داڤۆس لە كۆبونەوەیەكدا لە شاری ستۆكهۆڵم ھانی كۆمپانیاكانی سویدی داوە كە بە مەبەستی وەبەرهێنان شاندی بازرگانی بۆ ھەرێمی كوردستان بنێرن.
دۆخی سیاسیی سووریا و دۆخی ئاوارەكانی سووریا لە ھەرێمی كوردستان و هەروەها ڕەوشی ئاساییشی عێراق و ھەڵبژاردنی ئەنجوومەنی نوێنەرانی عێراق تەوەرێكی دیكەی ئەو كۆبونەوەیە بوو.
هه‌ر لەم دانیشتنەدا هەردوولا گرینگی بەشداریكردنی وڵاتان لە كۆڕبەندی جیھانیی داڤوس بۆ دروستكردنی پردی پەیوەندیی نێوان گەلان بە بەرز نرخاند.
