كومبونه‌ك بو كێمكرن ونه‌هێلانا كاركرنا زاروكان ل سه‌ر جادا وناڤ باژێرێ دهوكێ
دهوك- تایبه‌ت ب KDP.info/ ل هولا جڤاتا پارێزگه‌ها دهوكێ ب ئاماده‌بونا به‌رێز به‌هزاد علی ئاده‌م جێگرێ پارێزگه‌رێ دهوكێ كومبونه‌كا هه‌ڤپشك هاته ل دارخستن دناڤبه‌را رێڤبه‌ری یا پولیسان ورێڤبه‌ریا چاڤدێریا جڤاكی ورێڤه‌به‌ریا كه‌مپا دومیز یا په‌نابه‌ران ونونه‌رێ رێكخراواUNCIFوچه‌ند رێكخراو ولایه‌نێن پوته‌ی دده‌نه زاروكان ل دهوكێ .
دكومبونێ دا جێگرێ پارێزگه‌رێ دهوكێ ته‌كه‌زكر كو كاركرنا زاروكان ل ناڤ باژێری ول سه‌ر جادا نه‌خاسمه زاروكێن ژكه‌مپا دومیز یا په‌نابه‌ران وجهێن دن دهێن سه‌رهلدایه ویا به‌ره‌ف زێده‌بونێ دچیت وداخاز ژهه‌موو لایه‌نا كر كو پێشنیار ورێكێن یاسایی بگرنه ده‌ست ولدوف پره‌نسیپ ومافێن مروڤی ومافێن زاروكان سه‌ره‌ده‌ریی دگه‌ل بكه‌ن بوكێمكرن وبنبركرنا دیاردا هان وبه‌رهه‌ڤیا پارێزگه‌هێ نیشان دا بو هه‌ر هاریكاریه‌كێ .
پاش به‌رهه‌ڤبویێن كومبونێ ب تێروته‌سه‌لی گه‌نگه‌شه ل دور بابه‌تی كرن وپێشنیارێن گونجای ده‌ست نیشانكرن كوكاركرنا زاروكان ل ناڤ باژێرێ دهوكێ بهێته كێمكرن .
ل دور بابه‌تێ كومبونێ به‌هزاد علی ئاده‌م جێگرێ پارێزگه‌رێ دهوكێ بو سازیێن را گه‌هاندنێ گوت...ئه‌و زاروكێن كاردكه‌ن هه‌موو نه‌یێن كه‌مپا دومیزن به‌لكو ژده‌روبه‌رێن كه‌مپێ وئه‌و جهێن په‌نابه‌ر لێ هه‌ین دهێن ئانكو 99% زاروكێن په‌ناهندێن روژئاڤانه ...كومبون ل دور وێ یه‌كێ بو كا چاوا كاری بكه‌ین وچاره‌سه‌ریا بابه‌تی بكه‌ین ونه‌هێلین به‌ره‌ف دیارده‌بونێ بچیت، ئه‌م ب هیڤی نه كو بابه‌ت ب رێكێن زانستی ویاسایی بهێته چاره‌سه‌ركرن، پشتی هنگی دێ بابه‌تی دگه‌ل دادگه‌ها تێهه‌لچونێ ژی گه‌نگه‌شه‌كه‌ین كو چاره‌سه‌ریه‌ك بو بهێته دیتن وزاروك ژمه‌ترسیا كاركرنێ ل سه‌ر جادا وناڤ باژێری بهێنه پاراستن.
هه‌روه‌سا ل باژارێ دهۆكێ ب مه‌راما نه‌هێلانا دیارده‌یا كاركرنا زارۆكان ب تابیه‌ت ژی زارۆكێن كوردێن رۆژئاڤا، ب ئاماده‌بونا رێخستیا یۆنسیف و رێڤه‌به‌رێن سازیێن په‌یوه‌ندیدار ل هۆلا جڤینێن پارێزگه‌ها دهۆَكێ جڤینه‌ك هات سازكرن.
د جڤینێ ده ده‌رخستنا یاسایه‌كی ژبۆ زارۆكێن كوردێن رۆژئاڤا ئه‌وێن ل د هۆكێ و ده‌ردورێن وێ ئاكنجینه، نه‌هێلانا دیارده‌یا كاركرنێ و خاستنێ وهن ئاریشێن دن هاته به‌حس كرن. پشترا نوونه‌رێن سازیێن جودا چالاكیێن خوه ل هن مه‌هێن ده‌رباسبوویی ده به‌حس كرن.
تێ زانین كومیته‌یا پاراستنا مافێن زارۆكان ل پارێزگه‌ها دهۆكێ مه‌هانه جڤینێن خوه ساز دكه و ئامار و داتایێن كاركرنا زاروكان به‌رچاڤێ ئالیێن په‌یوه‌ندیدار بكه‌ن.
