لە بارەی دواکەوتنی مووچە مامۆستایانی گه‌رمیان، یەکێتی مامۆستایانی داوای روونکردنەوە لە وەزارەتی دارایی دەکات
ھەولێر- تایبەت بە KDP.info/ جێگری سەرۆکی یەکێتی مامۆستایانی کوردستان دەڵێت: پێویستە وەزارەتی دارایی حکوومەتی ھەرێمی کوردستان روونکردنەوە لە بارەی دواکەوتنی مووچەی مامۆستایان بدات، کە ماوەیەکە ئەم کێشەیە رووبەروی مامۆستایان بۆتەوە.
ئەحمەد گەرمیانی جێگری سەرۆکی یەکێتی مامۆستایانی کوردستان بە kdp.infoراگەیاند:تەنیا موچە بە مامۆستایان دەدرێت ، لە کاتێکدا پێویست بوو کە ئیمتیازاتی دیکەشیان پێبدرێت، بەڵام بەداخەوە ئەو موچەیەش بەشێوەیەکی دروست و لە کاتی خۆیدا بە مامۆستا نادرێت و پارساڵ مووچەی مامۆستایانی سلێمانی وگەرمیان بۆ ماوەی سێ مانگ دواکەوت کە تووشی کۆمەلێک کێشە و گرفتی مادی بوونەوە، سەرەڕای ئەمەش مامۆستایان لە کاری خۆیان بەردەوام بوون تاوەکو کێشەکە چارەسەر بوو.
ئەحمەد گەرمیانی گوتیشی: ئەمساڵیش بەھەمان شێوەی پارساڵ ئەو کێشەیە دووبارە بۆتەوە کە لە خانەقین دەستی پێکرد و مانگی رابردوو ماوەی 45رۆژ ئینجا مووچەیان وەرگرت و ئەم مانگەش لە گەرمیان و سلێمانی مووچەکەیان دواکەوت، ئەمەش بۆتە ھۆی نیگەرانی یەکێتی مامۆستایانی کوردستان و ھەموو مامۆستایان.
گەرمیانی روونیشیکردەوە، ئەم دواکەوتنە گوایە بەھۆی نەمانی پارەیە کە ئەمەش ناجێتە ھزر و گیرفانی ھیچ کەسێکەوە، بۆیە بە پێویستی دەزانین وەزارەتی دارایی روونکردنەوە لەمبارەیەوە بدات و کاریش بکرێت بۆ ئەوەی ئەم حالەتە دووبارە نەبێتەوە.
