سەرۆكی هەرێمی كوردستان پێشوازی لە یاریدەدەری جێگری وەزیری دەرەوەی ئەمەریكا دەكات

پاشنیوەڕۆی ئەمڕۆ شەممە 11ـی 1ـی 2014 لە سەلاحەدین بەڕێز مەسعود بارزانی پێشوازی لە بڕێت مەكگوورك یاریدەدەری جێگری وەزیری دەرەوەی ئەمەریكا و شاندێكی یاوەری كرد.

لە كۆبوونەوەیەكدا بارودۆخی سیاسی و ئەمنی عێراق و دوا پەرەسەندنە ئەمنی و سیاسییەكانی پارێزگای ئەنبار تاوتوێ كرا و قسە لەسەر ئەو ڕێگەچارانە كرا كە دەبنە هۆی كۆتاییهێنان بە قەیرانی سیاسی و ئەمنی عێراق بە گشتی و پارێزگای ئەنبار بە تایبەتی. لەم كۆبوونەوەیە هەردوولا لەسەر ئەوە هاوڕا بوون كە پێویستە هەموو لایەك هەوڵ بدەن قەیرانی ئێستای پارێزگای ئەنبار نەبێتە زەمینەیەك بۆ هەڵگیرساندنی شەڕی تاییفی نێوان شیعە و سووننە.

پەیوەندییەكانی نێوان هەرێمی كوردستان و حكوومەتی عێراقی فیدڕاڵ و بارودۆخی سیاسیی سووریا و دواڕۆژی ئەم وڵاتە و كۆنفڕانسی ژێنێڤ 2 و هەروەها بارودۆخی مرۆیی پەنابەرانی سووریا تەوەرێكی دیكەی دانیشتنی نێوان سەرۆك بارزانی و یاریدەدەری جێگری وەزیری دەرەوەی ئەمەریكا بوو. لە كۆتایی ئەم كۆبوونەوەیەدا بڕیار درا كە هەرێمی كوردستان و ئەمەریكا لە هەماهەنگیی و ڕاوێژی بەردەوامدا بن بۆ دۆزینەوەی چارەسەری گونجاو بۆ قەیرانەكانی عێراق.