ئەردۆغان سەردانی تاران و رۆحانیش سەردانی ئەنقەرە دەكات
ئەنقەرە- KDP.info/ دوێنێ هەر دوو وەزیرانی دەرەوەی ئێران و توركیا لە ئەنقەرە كۆبوونەوە. لە كۆبوونەوەكەدا هەر دوولا باسیان لە چەندین بابەتی گرنگ و رەوشی ناوچەكە و سوریا كرد.
لە سەرەتای كۆبوونەوەكەدا سەرەڕای گفتوگۆ لە سەر پەیوەندییەكانی نێوان ئێران و توركیا، هەر دوولا جەختیان لە سەر هەوڵدان بۆ بەهێزتركردنی پەیوەندی سیاسی و دیپلۆماتیكی لە نێوان ئەنقەرە و تاراندا كردەوە.
لە بارەی رەوشی سوریایشەوە وەزیری دەرەوەی توركیا گوتی: بۆ ئەوەی كۆتایی بە قەیرانی مرۆیی لە سوریا بهێنرێ چی پێویست بێ دەكرێ. توركیا تا ئێستا بۆ ئەو مەبەستە هەوڵی داوە و بەردەوام دەبێ لە هەوڵدانەكانی.
داود ئۆغڵو ئاماژەی بەوە كرد بۆ چارەسەر كردنی قەیرانی سوریا و كۆتایی هێنانی بە تراژدیای مرۆیی لە سوریا لەگەڵ ئێراندا بیروڕای خۆیان ئاڵووێر دەكەن.
دوای كۆتایی هاتنی كۆبوونەوەكە داود ئۆغڵو و محەمەد جەواد زەریف لە كۆنگرەیەكی رۆژنامەوانی هاوبەشدا ناوەڕۆكی كۆبوونەوەكەیان خستە روو.
لەو چوارچێوەیەدا داودئۆغڵو گوتی: كۆتایی ئەم مانگە سەرۆكوەزیرانی توركیا سەردانی ئێران دەكا، هەر لە مانگی شوباتدا چاوەڕوانی سەردانی حوسێن رۆحانین بۆ ئەنقەرە.
داودئۆغڵو لە بەشێكی دیكەی قسەكانیدا نیگەرانی ئەنقەرەی لە بەرامبەر رووداو و پێشهاتەكانی عێراق دەربڕی و گوتی: رووداو و پێشهاتەكانی ئەم داوایەی عێراق جێگای ترسن، ئاواتە خوازین لە هەڵبژاردنەكانی 30ی مانگی نیساندا عێراق رووی ئارامی و ئاشتەوایی بە خۆیەوە ببینێ.
