ل ئامێدیێ ، بنگه‌هێ ساخله‌میێ شه‌هیدو ئه‌نفالكریان هاته ڤه‌كرن
ئامێدیێ-KDP.info / ب بهرههڤبوونا هه‌ژماره‌كا به‌رپرس و رێڤه‌به‌ر و كارمه‌ندێن داموده‌زگه‌هێن میری و حزبی و خێزانێن سه‌ربلندێن شه‌هید وئه‌نفالكریان بنگه‌هێ ساخله‌میێ شه‌هیدو ئه‌نفالكریان ل ئامێدیێ هاته ڤه‌كرن ل روژا دووشه‌مبی رێكه‌فتی ٣٠/١٢/٢٠١٣.
د چارچوڤێ رێوره‌سمێن ڤه‌كرنێدا و پشتی گه‌ریانه‌كێ دناڤا پشكێن بنگه‌هی دا به‌ره‌ڤان حه‌مدی رێڤه‌به‌رێ گشتی ل وه‌زاره‌تا شه‌هید و ئه‌نفالكریان گوت : (سوپاسیا بهرههڤبوونا هه‌وه دكه‌ین كو پالپشتییه بو كارێن وه‌زاره‌تا شه‌هیدو ئه‌نفالكریان ژبو خزمه‌تكرنا كه‌س وكارێن شه‌هیدو ئه‌نفالكریان و ب تایبه‌ت سوپاسیا هێژا فه‌ریق فاروق به‌رپرسێ لقێ١٨ دكه‌م كو براستی بیروكا دروستكرنا ڤی بنگه‌هی یا وی بوویه و گه‌هاندیه جهێن په‌یوه‌ندیدار و دووڤچوون بو كریه تا ئه‌ڤرو ).
ژ لایێ خوڤه به‌رپرسێ لقێ١٨ د داخویانیكا تایبه‌تدا بو مالپه‌رێ لقێ١٨ گوت : (ئه‌ڤ ئازادی وته‌ناهی و خوشگوزه‌رانیا ئه‌ڤرو ئه‌م تێدا به‌رهه‌مێ خه‌باتا دیر و درێژا گه‌لێ مه و خوینا شه‌هیدایه و ئه‌م چ بو وێرسێن ڤان شه‌هیدان بكه‌ین ئه‌م بهایێ ئێك چپك ژ خوینا وان ناده‌ین به‌لێ لگوره‌ی شیانان یا ژمه بهێت ئه‌م كێم خه‌میێ ناكه‌ین ، هه‌ر ل ده‌ستپێكا ده‌ستبكاربوونا من ل لقێ١٨ من هزر د ڤه‌كرنا ڤی بنگه‌هیدا كریه وكاربو كریه و خوشبه‌ختانه ئه‌ڤرو كه‌فته دخزمه‌تا خه‌لكێ مه‌دا ، كو باشترین خزمه‌ت و بێ به‌رامبه‌ر بو كه‌سوكارێن شه‌هید وئه‌نفالكریان بهێته كرن، سوپاسیا قایمقامێ ئامێدیێ و كاك به‌ره‌ڤان و كاك نسره‌ت و رێڤه‌به‌رێ ساخله‌میا گشتی ل دهوكێ و ساخله‌میا ئامێدیێ دكه‌م بو پالپشتی و هاریكاریا وان ، دیسان داخازا سه‌ركه‌فتنێ بو ستافێ كاریێ ڤی بنگه‌هی دكه‌م .)
سه‌باره‌ت خزمه‌تێن بریاره بنگه‌هێ ناڤهاتی پێشكێش بكه‌ت د.نه‌جیب رێڤه‌به‌رێ بنگه‌هی گوت (هه‌می خزمه‌ت دێ بێ به‌رمبه‌ربن و پشكنین ژلایێ نوژدارێن تایبه‌تمه‌ندڤه بو نه‌ساخان دێ هێنه كرن زێده‌باری شروڤه‌كرنێن (تحلیلات) پێتڤی و تیشك وسونار و هه‌ر خزمه‌ته‌كا دی یا پێتڤی و به‌رده‌ست).
ژ هه‌ژی گوتنێیه ل ده‌مژمێر (٤) ئێڤاریا ئه‌ڤرو بنگه‌هێ ساخله‌میێ شه‌هید و ئه‌نفالكریان ژ لایێ هه‌ر ئێك ژ حسێن خالد قایمقامێ قه‌زا ئامێدیێ د. عه‌بدوللا جاسم نوونه‌رێ رێڤه‌به‌رێ گشتیێ ساخله‌میا دهوك و ب بهرههڤبوونا هێژایان فه‌ریق فاروق به‌رپرسێ لقێ١٨ی پارتی دیموكراتی كوردستان و به‌ره‌ڤان حه‌مدی رێڤه‌به‌رێ گشتی ل وه‌زاره‌تا شه‌هید و ئه‌نفالكریان و نسره‌ت محمه‌د رێڤه‌به‌رێ رێڤه‌به‌ریا گشتی یا شه‌هید و ئه‌نفالكریان ل پارێزگه‌ها دهوك و د. نه‌جیب سپینداری رێڤه‌به‌رێ ساخله‌میا قه‌زا ئامێدیێ و ره‌جه‌ب جاسم رێڤه‌به‌رێ رێڤه‌به‌ریا شه‌هیدو ئه‌نفالكریان ل ئامێدیێ و خێزانێن سه‌ربلندێن شه‌هید وئه‌نفالكریان بنگه‌هێ ساخله‌میێ شه‌هیدو ئه‌نفالكریان ل ئامێدیێ هاته ڤه‌كرن .
