هاوپەیمانیی كوردستان و لیستی عێراقییە سوورن لەسەر وەرگرتنەوەی متمانە لە مالیكی
جێگری سەرۆكی فراكسیۆنی هاوپەیمانیی كوردستان لە ئەنجوومەنی نوێنەرانی عێراق رایدەگەێنێت: تا ئەو ساتە هاوپەیمانیی كوردستان و لیستی عێراقییە سوورن لەسەر وەرگرتنەوەی متمانە لە مالیكی.
موحسین سەعدوون جێگری سەرۆكی فراكسیۆنی هاوپەیمانیی كوردستان لە ئەنجوومەنی نوێنەرانی عێراق بەئاكانیوزی ڕاگەیاندووە: هاوپەیمانیی نیشتمانی كارنامەیەكی چاكسازیی ڕاگەیاندووە، بەڵام دەبێ ئێمە و هەموو لایەنەكانی تر بەو كارنامەیە ڕازی بین، ئینجا دەبێ جێبەجێ بكرێ.
ئاماژەی بەوەشدا كە تا ئەو ساتە ئێمە وەكو لیستی هاوپەیمانیی كوردستان و لیستی عێراقییە سوورین لەسەر وەرگرتنەوەی متمانە لە نووری مالیكی سەرۆك وەزیران عێراق.
ناوبراو ئاشكرایشی كرد: لە دوو ڕۆژی داهاتوودا شاندێكی پەرلەمانی عێراق كە نوێنەری هەموو پێكهاتەكانی تێدایە بەكوردیشەوە، سەردانی هەرێمی كوردستان دەكەن و لەگەڵ ئاشتی هەورامی وەزیری سامانە سروشتییەكان و بەرپرسانی تری هەرێم كۆ دەبنەوە لەبارەی بارودۆخی نەوتی هەرێم.
گوتیشی: ئەو لێژنە تەنیا بۆ بینی باردۆخەكە دێن، نەك هەندێك كەس باسی دەكا كە ئەوە لێژنەی لێپرسینەوەیە.
