ئاژانسا جایكا یاژاپونی بكوژمێ 600ملیون دولاران پروژا ل هه‌رێما كوردستانێ بجه دئینیت
دهوك-KDP.info/ ئه‌ڤرو ته‌مه‌ر ره‌مه‌زان پارێزگه‌رێ دهوكێ پێشوازیا شانده‌كێ ئاژانسا جایكا یا ژاپونی ب سه‌روكاتیا (شوهی هارا) به‌رپرسێ ئاژانسێ ل عیراقێ كر .
دهه‌ڤدیتنه‌كێدا به‌حسێ پروژێن ئاژانسا جایكا یا ژاپونی ئه‌وێن ل جهێن جودا ل پارێزگه‌ها دهوكێ دهێنه ئه‌نجامدان كو ژمارا وان 3پروژه‌نه دوارێ باشكرنا تورێن ئاڤێ وكاره‌بێ وبه‌رهه‌مئینانا كاره‌بێ دا دگه‌ل 2 پروژێن دن یێن چاندنێ یێن پێشنیاركری هاته كرن.
دته‌وه‌ره‌كێ دن دا به‌حسێ ره‌وشا په‌ناهندا ل پارێزگه‌هێ وئه‌و هاریكاریێن حكومه‌تا ژاپونی بو وان دكه‌ت هاته كرن،سه‌روكێ ئاژانسا جایكا خوشحالیا خو ب وێ پێشكه‌فتنێ دیاركر یا كو پارێزگه‌ها دهوكێ بخوڤه دبینیت وته‌كه‌زكر كو ئاژانسا وان دڤێت پروژێن هان ب ته‌كنیكه‌كا نوو بهێنه ئه‌نجامدان دا خه‌لكێ پارێزگه‌هێ مفایه‌كێ باش ژێ وه‌رگریت.
ژلایێ خوڤه پارێزگه‌رێ دهوكێ خوشحالیا ب هاتنا شاندێ جایكا دیاركر وسوپاسیا حكومه‌ت وئاژانسا جایكا یا ژاپونی كر وپه‌سنا كار وپروژێن وان كر وگوت ئه‌ز پشت راستم كو پروژێن جایكا ل پارێزگه‌هێ سه‌ركه‌فتیانه دێ هێنه ئه‌نجامدان وبه‌رهه‌ڤیا پارێزگه‌هێ بو هه‌ر هاریكاریه‌كێ نیشان دا.
تێ زانین ئاژانسا جایكا یا ژاپونی بكوژمێ 600ملیون دولاران پروژا لهه‌رێما كوردستانێ ئه‌نجامده‌ت ژوانا 5پروژه دكه‌ڤنه سنورێ پارێزگه‌ها دهوكێ وه‌كوپروژێن باشكرنا تورێن ئاڤێ وكاره‌بێ ودورستكرنا ویسَتگه‌هێ به‌رهه‌مئینانا كاره‌بێ ب ئاڤێ ل ده‌ڤه‌را دێره‌لوكێ و 2پروژێن چاندنێ یێن پێشئێخستنا به‌رهه‌مێ گه‌نمی وكه‌سكاتی.
