توركیا هێشتا بۆ رۆژنامەنووسان وڵاتێكی مەترسیدارە
نیۆیۆرک - KDP.info/ كۆمیتەی جیهانی پاراستنی رۆژنامەنووسان راپۆرتی خۆی لە بارەی بارودۆخیرۆژنامەنووسی لە جیهاندا بڵاو كردەوە و رایگەیاند كە توركیا ماوەی دوو ساڵە بۆ رۆژنامەنووسان وڵاتێكی مەترسیدارە.
بە پێی هەواڵێكی ماڵپەڕی دیموكرات خەبەر، رێكخراوی جیهانی پاراستنی رۆژنامەنووسان ( سی پی تی) لە راپۆرتەكەی خۆیدا ئاماژەی بەوە كردووە كە لە ساڵی 2013دا لە سەرانسەری جیهان 52 رۆژنامەنووس لە كاتی راپەراندنی ئەركی خۆیاندا كۆژراون و ساڵی رابردوو لە سەرانسەری جیهان 73 رۆژنامەنووس كوژرابوون.
سی پی تی لە بەشێكی دیكەی راپۆرتەكەی خۆیدا باسی ئەوەی كردووە كە ئەمساڵ سوریا یەكەمین وڵاتی مەترسیدار بووە بۆ رۆژنامەنووسان و 21 پەیامنێر لە سوریا كوژراون. پێنج رۆژنامەنووس لە میسر، پێنج لە پاكستان، چوار لە سۆمال، سێ لە عێراق، سێ لە بەرازیل، دوو لە مالی و دوو رۆژنامەنووسی دیكە لە روسیا كوژراون.
لە بەشێكی دیكەی ئەو راپۆرتەدا ئاماژە بەوە كراوە كە دوو ساڵە توركیا یەكەمین وڵاتە كە زۆرترین رۆژنامەنووسی تێیادا گیراوە و دوای توركیا هەر یەك لە ئێران و چین دوو وڵاتی دیكەن كە ژمارەیەكی زۆر رۆژنامەنووس تێیایاندا بەند كراون.
