دەزگای رۆشنبیری و راگەیاندنی پارتی: ئیدانەی کوشتنی کاوە گەرمیانی دەکەین و با تاوانبارانیش سزای یاسایی بدرێن

هەولێر- تایبەت بە  KDP.info/   دوای ئەوەی شەوی رابردوو رۆژنامەنووس کاوە گەرمیانی لە لایەن چەند چەکدارێکی نەناسراو لەبەردەم ماڵەکەی دەستڕێژی گوللەی لێکرا و دەستبەجێ گیانی لەدەستدا، دەزگای رۆشنبیری و راگەیاندنی پارتی دیموکراتی کوردستان ئیدانەی ئەم کردەوە ترسناکەی کرد و داواشی کرد کە تاوانباران بدۆزرێنەوە و بدرێنە دادگا.

لەم رونکردنەوەیەدا مەکتەبی رۆشنبیری و  راگەیاندنی پارتی دیموکراتی کوردستان رایگەیاند: بەداخەوە دوێنێ شەو، رۆژنامەنووس کاوە گەرمیانی لەبەردەم ماڵەکەی خۆی لەلایەن چەند چەکدارێکی نەناسراو شەهید کرا، ئەم کارە نامرۆڤانەیە بە توندی ئیدانە دەکەین و داواش لە دامودەزگا بەرپرسەکانی ناوچەکە دەکەین بەزووترین کات تاوانباران بدۆزنەوە و دادگایی بکرێن و بە سزای یاسایی بدرێن، بۆ ئەوەی کەس ئیرادە نەکات کاری لەمجۆرە دووبارە بکاتەوە و  یاساش رێرەوەی ئاسایی خۆی وەربگرێت.

پێویستە دەزگا بەرپرسەکان لەتەک دۆزینەوە و دادگایی کردنی تاوانبارانی ئەم کارە نامرۆڤانەیە، هەمیشە بۆ پاراستنی ئاسایش و گیانی هاووڵاتیان و  بەتایبەتیش رۆژنامەنووسان وەکو هەمیشە هاوکاری پێشکەش بکەن، بۆ ئەوەی رەوشی ئارامی کوردستان و  ئازادی را دەربڕین و بڵاوکردنەوە هەمیشە لە پێناو خزمەتکردنی کۆمەڵگای کوردستان بەرێوەبچێت،  چونکە ئەم کارانە دەبنە مایە شێواندنی ئارامی و ئاسایشی کوردستان و ترساندنی هاووڵاتیان، بۆیە ئاشکراکردنی تاوانبارەکان، هەم دڵی خانەوادەکەی ئارام دەکاتەوە  و هەمیشەش  راستییەکان وەکو خۆیان ئاشکرا دەبن و هاوکارە رۆژنامەنووسەکانیشی دەتوانن باشتر لە کەشی ئارامدا کارەکانیان راپەڕێنن. لە کۆتایدا سەرەخۆشی لە خانەوادەی کاک کاوە گەرمیانی  و هاوپیشەکانی دەکەین.