دیاریا سەرۆك بارزانی گەهشتە والیێ شرنەخی
بۆ گەهاندنا دیاریا سەرۆكێ هەرێما كوردستانێ، ئەڤرۆ رێكەڤتی 3/12/2013ێ، حەمید عەلی، سەرپەرشتێ كومەلگەها دەروازێ نیڤدەولەتی ئیبراهیم خەلیل، سەرەدانا والیێ شرنەخێ( حەسەن ئیپەك )كر و دیاریا سەرۆك بارزانی، پێشكێشی وی كر.
ژ لایێ خۆڤە، والیێ شرنەخێ ب گەهشتنا دیاریا سەرۆكێ هەرێما كوردستانێ، خۆشحالیا خۆ دەربری و ژ بۆ ڤێ رێزگرتنێ، سۆپاسیا سەرۆك بارزانی كر.
د ڤێ هەڤدیتنێ دا باس لسەر چوونا سەرۆك بارزانی بۆ وەلاتێ توركیا هاتە كرن و ژ لایێ خۆڤە ژی والیێ شرنەخێ، خۆشحالیا خۆ ب وێ سەرەدانێ دیار كر و ب گرنگی دا زانین.
د تەوەرەكێ دی یێ ڤێ هەڤدیتنێ دا باس لسەر گرنگیا پەیوەندیێن هەردولا هاتە كرن و ژ بۆ باشتركرن و پێشئێخستنا كەرتێ بازرگانیێ و كاری دناڤبەرا هەردوو لایاندا، پشتەڤانیا هەڤدو دوپات كرنەڤە.
ژ ئالیەك دن باس لسەر ڤەكرنا وان دەرگەه و پرێن دی یێن كۆ دێ دناڤبەرا هەرێما كوردستانێ و وەلاتێ توركیادا هێنە ڤەكرن هاتە كرن.
ژ لایێ خۆڤە، والیێ شرنەخێ ژی، وەكۆ رێزگرتنەك بۆ هەڤكاریا سەرپەرەشتێ كومەلگەها دەروازێ نیڤدەولەتی ئیبراهیم خەلیل، دیاریەك پێشكێش كر.
