قونسلێ ئه‌مریكا په‌سنا ئاڤه‌دانیا دهوكێ كر
دهوك-تایبت ب KDP.info/ بمه‌ره‌ما هه‌ڤدوو نیاسینێ و خورتكرنا په‌یوه‌ندیێن ئابوورى و بازرگانى ئه‌ڤرو شانده‌كێ كونسلخانه‌یا ئه‌مریكى ل هه‌ولێرا پایته‌ختێ هه‌رێمێ ب سه‌رۆكایه‌تیا (جوزێف پێنینگون) قونسلێ گشتى سه‌ره‌دانا ژوورا بازرگانى و پیشه‌سازى یا دهۆكێ كر و ژلایێ سه‌رۆك و ئه‌ندامێن ژوورێ ڤه هاتنه پێشوازیكرن.
د هه‌ڤدیتنه‌كێدا (ئه‌یاد حه‌سه‌ن ) سه‌رۆكێ ژوورا بازرگانى و پیشه‌سازى یا دهۆكێ پشتى بخێرهاتنێ كورتیه‌ك دا سه‌ر دیروكا دروستبونا ژوورا بازرگانى و پیشه‌سازى یا دهۆكێ وب تایبه‌ت پشتى سالا (2003) كو دورهێله‌كى نوى و بهێز كه‌فتیه د ئابوورى عیراقێ هه‌میێ دا و بنه‌جهبونا ئاسایشێ و عه‌قلێ ڤه‌كرى یێ حكومه‌تا كوردستانێ ب سه‌ده‌هان كومپانیێن وه‌به‌رهێنانێ هینانه د مه‌یدانێن ئاڤاكرنا كوردستانێ دا.
دیسان سه‌رۆكێ ژوورێ به‌حسى ئاڤاكرنا فروكخانا دهۆكێ و ده‌ڤه‌را پیشه‌سازى و كارگه‌هێن گرنگ كر كو هانده‌رێ پێشڤه‌چونا ئابوورێ ده‌ڤه‌رێ نه و له‌ومان خواست كو كونسلخانه ب رژدى كار بكه‌ت ژبۆ هینانا كومپانیێن ئه‌مریكى كو بازار و ئابوور و سیاسه‌تا مه گه‌له‌ك پێدڤى پێ هه‌یه .
ژلایێ خوڤه كونسلێ گشتى یێ ئه‌مریكى سوپاسیا سه‌رۆكێ ژوورێ كر و گوت:- هه‌لبه‌ت كارێ مه‌یه ئه‌م باوه‌ریێ بۆ بازرگان و سه‌رمایه‌دار و خودانیێن كومپانیێن ئه‌مریكى چێكه‌ین كو بهێنه ڤێرێ وه‌به‌رهێنانێ ئه‌نجام ده‌ن، و ژبه‌ر هندێ ئه‌ڤرۆ ئه‌م لڤێره‌ینه داكو گوهداریا وان ئاسته‌نگا بكه‌ین یێن دكه‌ڤنه درێكا وه‌به‌رهێنانا ئه‌مریكى دا ل هه‌رێما كوردستانێ، چونكه ل كێم جهان ئه‌ڤ پێشڤه‌چونا بله‌زا ئابوورى دهێته دیتن، هه‌ر وه‌سان گوت مه ل هه‌یڤا تیرمه‌ها بوورى ده‌ست ب به‌لاڤكرنا ڤیزێن ئه‌مریكى ل هه‌ولێرى كرییه و ب ره‌نگه‌كى نورمال ئه‌ڤ ڤیزه ب بازرگانێن كورد دهێنه دان.
