شێڤرمەندێ ئەردۆغان یالچن ئاكدۆغان: "PYDب ئاوایەكی ئەشكەرە دخوازە ل دەڤەرێ باندۆرا رێڤەبەریا هەرێما كوردستانێ بشكینە
تورکیە - تایبەت بە KDP.info / پارلەمەنتەرێ ئاك پارتی یێ ئەنقەرە، شێڤرمەندێ سەرۆك وەزیرێ تركیێ، نڤیسكار و ئاكادەمیسیەن یالچن ئاكدۆغان، د رۆژناما ستار یا تركی دە مژارەك ل دۆر پێڤاژۆیا چارەسەریێ نڤیساندیە و د بەشەكی دن یا مژارا خوە دە بالێ دكێشە هەلوەستا PYDو تێدە وەها دبێژە: "د دەربارێ پێڤاژۆیێ دە دوو گۆتنێن جودا دبهیسین. ژ ئالیێ حكوومەتێ ڤە تێ خوویا كرن كو، پێڤاژۆ داوی نەبوویە، بەردەوامە و هەر ئالیێ كو پێڤاژۆیێ داوی دینە نكارە تو حسابێ بدە گەل و ژ ڤێ گونەهێ رزگار نابە. ئالیێ دن BDPو قەندیل خوویا دكن كو، پێڤاژۆ داوی بوویە، حكوومەت خوە ژبۆ شەر ئامادە دكە، دبە كو شەرەكی ناڤخوە دەركەڤە و چەكان بكاربینین. ژ ئالیەكی تێگەهەكی پۆزتیف و ژ ئالیەك دن ژی تێگەهەكە نەگاتیف هەیە. یا ئەساسی نە ئەڤە كو هێڤیان بشكینن و گەل بترسینن، دڤێ هێڤیان زندی بكن و خوەشبینیەك ئاوا بكن".
هەروەها، پارلەمەنتەرێ ئاك پارتی یێ ئەنقەرە، شێڤرمەندێ ئەردۆغان، نڤیسكار و ئاكادەمیسیەن یالچن ئاكدۆغان، د بەشەكە دن یا مژارا خوە دە بالێ دكێشە هەلوەستا PYDو تێدە وەها دبێژە: "د وارێ پێڤاژۆیێ دە كەسێن كو حكوومەتێ رەخنە دكن و دبێژن، "هەلوەستا تركیێ یا ل هەمبەر PYDـێ شكەستنێ ئاوا دكە". گەر ئەڤ كەسانە گۆتن و ئارمانجێن پەكەكێ وەك دانە و بنگەهێن قەبوول دكن، بوویەرا PYDـێ ژی ب ئاوایەكی راست دبینن. PYDنە تەنێ دژی تركیێ هەلوەستان نیشا ددە، بەرەنگاریا گرووپێن كورد یێن وێ دەرێ ژی دكە. هەروەها، هەلوەستەكە دژمنانە نیشا پارتیا دەمۆكراتا كوردستانێ ددە".
هەروەها نڤیسكار درێژیا مژارا خوە دە دبێژە: "رێڤەبەرێن پەكەكێ یێن كو مژاران دنڤیسن، ب ئەشكەرەیی پارتیا دەمۆكراتا كوردستانێ (PDK)وەك دژمنێ كورد و دژمنێ شۆرەشا رۆژئاڤا نیشا ددن. PYDب ئاوایەكی ئەشكەرە دخوازە ل دەڤەرێ باندۆرا رێڤەبەریا هەرێما كوردستانێ بشكینە. بیروباوەریا كو پارتیا دەمۆكراتا كوردستانێ (PDK)وەك نژادكوژ ناڤ دكە، نۆرمالە كو تركیێ تاوانبار بكن، سەدەم ئەڤە كو PYD، ل هەمبەر بەرفرەهكرنا پەیوەندیێن د ناڤبەرا رێڤەبەریا هەرێما كوردستان و تركیێ دە پر دلگرانە. د ئەنجام دە تاوانباركرنا حكوومەت و یان ژی درستكرنا دلگرانیێ پر هێسانە. لێ ئەو رێ، نە رێیەكە راستە و ب تەنێ تێ واتەیا خوین و رۆندكێن چاڤان."
وەرگێران: ئیرفن شەمزینی
