پارێزگه‌رێ دهوكێ دوڤ چوونا پروژێ ئاڤاكرنا فاملی مول یێ كه‌رتێ تایبه‌ت دكه‌ت
بو دوف چونا پروژێن وه‌به‌رهێنانێ یێن كه‌رتێ تایبه‌ت به‌رێز( ته‌مه‌ر ره‌مه‌زان) پارێزگه‌رێ دهوكێ دگه‌لدا چه‌ند رێڤه‌به‌رێن فه‌رمانگه‌هێن په‌یوه‌ندیدار سه‌را پروژێ (فاملی مول وفاملی فن ) ل نێزیك ده‌ڤه‌رداریا سێمێلێ دا ژلایێ خودانێ پروژه‌ی وئه‌ندازیارێن سه‌رپه‌رشت پێشوازی لێ هاته كرن.
پارێزگه‌رێ دهوكێ ویێن دگه‌لدا گه‌ریانه‌ك ل ناڤ پروژه‌ی كر وژنێزیك سه‌حكره قوناغێن ئاڤاكرنا پروژه‌ی وده‌ست خوشی وپیروزی ل خودانێ پروژه‌ی وتیمێ كاری كر به‌رامبه‌ر ئه‌و خه‌باتا بو ئاڤاكرنا پروژه‌ی دكێشن ...
تێ زانین پروژه ل سه‌ر روبه‌رێ پتر ژ190دونه‌ما دهێته ئاڤاكرن وتا نوكه 50% هاتیه ئاڤاكرن...
لدور گرنگیا پروژه‌ی (به‌ختیار ئه‌مین)رێڤه‌به‌رێ وه‌به‌رهینانێ ل پارێزگه‌ها دهوكێ گوت:ئه‌ڤه پروژه‌كێ گه‌شتیاری وبازرگانی یه پروژێ ئێكێ یه بڤی قه‌باره‌ی ل ده‌ڤه‌رێ دهێته ئاڤاكرن بو مه‌به‌ستێن بازرگانی وه‌كو مول ل پارێزگه‌ها دهوكێ، پارچه‌ك ژ ڤی پروژه‌ی وه‌كو یاریگه‌هه‌كێ یه تو دشێی دناڤدا بو بوراندا ده‌می وه‌كو بینڤه‌دان ب كاربینی...
به‌ختیار ئه‌مین دیار كر كو پروژه‌ی گرێدانه‌ك دناڤبه‌را سه‌نته‌رێ پارێزگه‌هێ وده‌ڤه‌رداریا سێمێلێ دا په‌یداكریه وپروژه دكه‌ڤیته سه‌ر رێكا ده‌وله‌تی یا ستراتیجی..
هه‌روه‌سا گوت ئه‌ڤ پروژه یێ كومپانیه‌كا كه‌رتێ تایبه‌ته ئه‌وژی (كومپانیا دارین)ه گه‌له‌ك پروژه ل هه‌ر سێ پارێزگه‌هێن هه‌رێمێ هه‌نه وسه‌ركه‌فتیانه ئه‌نجامداینه...
رێڤه‌به‌رێ وه‌به‌رهینانێ ل پارێزگه‌ها دهوكێ ئه‌و یه‌ك ژی دیاركر پروژه ب كوژمێ نێزیكی (100) ملیون $ دولارێن ئه‌مریكی دهێته ئاڤاكرن وهه‌تا نوكه ئاڤاكرنا یاریگه‌هێ گه‌هشتیه قوناغێن دوماهیێ كو 95% هاتیه بجه ئینان هه‌روه‌سا مول ژی ب رێژا 50% هاتیه بجه ئینان ولدوف پلانا كومپانیێ چاڤه‌رێ یه ل مه‌ها 7-8 یا سالا بهێت پروژه بكه‌ڤیته دخزمه‌تێ دا ودێ بیته پروژه‌كێ گرنگ ل ده‌ڤه‌رێ وخه‌لك ژناڤه‌راست وژێریا ئیراقێ ژی دێ قه‌ستكه‌تێ..
(به‌ختیار ئه‌مین) رێڤه‌به‌رێ وه‌به‌رهینانێ ل پارێزگه‌ها دهوكێ ئاماژه دا وێ چه‌ندێ كو نوكه پتر ژ 150پروژێن وه‌به‌رهێنانێ ل پارێزگه‌هێ هه‌نه بهایێ وان دگه‌هیته نێزیكی( 4) ملیار $ دولاران ئه‌و پروژه دوارێن گه‌شت وگوزاری وته‌ندورستی وئاكنجیبون وچاندنێ و...هتد هه‌نه.
