شەڕ و پێكدادان لە نێوان پۆلیس و دانیشتوانی نوسێبین رویدا
نوسێبین-KDP.info/ رۆژی دووشەممە لە هەر دوو لای سنووری نێوان توركیا و سوریا كوردانی دانیشتووی شارەكانی نوسێبین و قامیشلو دەستیان بە خۆپیشاندان بۆ پرۆتستۆكردنی دامەزراندنی دیوار لە سەر سنور كرد و پۆلیس هێرشی كردە سەر خۆپیشاندەران.
لەمبارەیەوە ماڵپەڕی ئیلكەخەبەر بڵاویكردەوە كە رۆژی دووشەممە دانیشتوانی شارەكانی نوسێبین و قامیشلو لەم دیو و ئەو دیوی سنوردا بۆ پرۆتستۆكردنی راكێشانی دیوار لە سەر سنور دەستیان بە خۆپیشاندان كرد و پۆلیسی توركیا هێرشی كردە سەر خۆپیشاندەرەكان.
لە سەرەتای هێرشەكەدا پۆلیس گازی فرمێسكڕێژی بۆ بڵاوەپێكردنی خۆپیشاندەرەكان بەكارهێنا، بەڵام خۆپیشاندەرەكان لە وەڵامی ئەو هێرشەی پۆلیسدا هێرشیان كردە سەر هێزەكانی پۆلیس و لە ئاكامدا شەڕ و پێكدادان لە نێوان پۆلیس و خۆپیشاندەرەكاندا هاتە ئاراوە و ژمارەیەك خۆپیشاندەر و پۆلیس بریندار بوون.
دانیشتوانی شاری قامیشلو لەو دیوی سنور بۆ پشتگیری كوردانی نوسێبین لە بەرانبەر هێرشی پۆلیسی توركیادا بە بەرد هێرشی پۆلیسیان كرد و پۆلیسیش چەندین بۆمبەی فرمێسكڕێژی بۆ ئەو دیوی سنور فڕدا و دانیشتوانی قامیشلۆش بۆ ئیدانەكردنی ئەو هێرشەی پۆلیس هێرشیان كردە سەر سێ ناوەندی پاسەوانی سنور لە ناوچەكەدا.
