قوتابخانەكانی گولەن دەست بە پەروەردەی كوردی دەكەن
دیاربەكر- KDP.info/ دوابەدوای راگەیاندنی پاكێجی دیموكراتیبوونی توركیا لە لایەن سەرۆك وەزیرانی ئەو وڵاتەوە، رۆژی چوارشەممە جێگری ده‌سته‌ی نووسەر و رۆژنامەنووسانی توركیا جەمال ئوشاق رایگەیاند كە گروپی خزمەت فەتحوڵلا گولەن ئامادەكاری بۆ دەستپێكردنی پەروەردە بە زمانی كوردی دەكات.
لەمبارەیەوە ماڵپەڕی دیاربەكر خەبەر بڵاویكردەوە كە جێگری سەرۆكی ده‌سته‌ی نووسەر و رۆژنامەنووسانی توركیا كە گەورەترین رێكخراوی گروپی گولەنە لە توركیا، باسی ئامادەكارییەكانی ئەو گروپە بۆ دەستپێكردنی پەروەرەدە بە زمانی كوردی لە قوتابخانەكانی سەر بە گروپه‌که كردووە.
جێگری سەرۆكی ده‌سته‌ی نووسەر و رۆژنامەنووسانی توركیا جەمال ئوشاق گوتی: دوای پەسەند كردنی پاكێجی دیموكراتیبوون لە لایەن پەرلەمانی توركیاوە، لە قوتابخانەكانی سەر بە گروپ دەست بە پەروەردە بە زمانی كوردی دەكرێت و بۆ ئەم مەبەستەیش ئامادەكاری پێویست كراون.
