پۆلیسی ھەولێر:تەقەی خۆشی شەوی رابردوو زۆر کەم بوو

ھەولێر-تایبەت بەKDP.info/ بەرێوبەری راگەیاندنی پۆلیسی ھەولێر ئاشکرایکرد، لە تەقەی خۆشی شەوی رابردوی شاری ھەولێر بەبۆنەی راگەیاندنی ئەنجامی بەرایی ھەڵبژاردنی پەرلەمانی کوردستان زۆر کەمبوو، تەنھا منداڵێک  بە سوکی بە گولە برینداربووە و کەسێکیش بەسەرخۆشی دەستگیرکراوە.

راید کاروان عەبدولکەریم بەرێوبەری راگەیاندنی پۆلیسی ھەولێر بەkdp.infoراگەیاند: لە  شاری ھەولێر شەوی رابردوو لە ھەندێک شوێن تەقەی خۆشی کراوە بەبۆنەی راگەیاندنی ئەنجامی بەرایی ھەڵبژاردنی پەرلەمانی کوردستان، لەئاکامدا منداڵێک لە گەڕەکی ھەڤالان  بە گولە برینداربوو و لەگەرەکی ئیسکانیش کەسێکی دیکە بە ھۆی ھەڵدانی یاری ئاگرین برینداربووە، بەڵام برینەکانیان سوکە  و ئێستاش باری تەندورستیان جێگیرە.

راید کاروان عەبدولکەریم گوتیشی: کەسێکی دیکە کە تەمەنی نزیک ٤٠ساڵان بوو بەسەرخۆشی تەقەی کردووە، بەڵام خۆشبەختانە ھیچ زەرەرێکی نەبووە و لەلایەن پۆلیسەوە دەستگیرکراوە.

عەبدولکەریم رونیشیکرده‌وە، ئەم جارە رێژەی تەقەکردنەکە زۆر کەمبوو به‌ بەروارد لەگەڵ جارانی پێشوو و ھیوادارین ئەم دیاردەیە ھەر نەمینێ.